Жиззах вилояти Бахмал туманида 5 август куни алимент пулини ундириш учун борган МИБ ходими пичоқлангани ҳақида хабар берилганди. Мажбурий ижро бюроси ходимининг аҳволи ва ҳолат юзасидан «Дарё»га маълумот тақдим этди.
Содир этилган жиноят иши тафсилоти ҳақида
Фуқаро Ф.Х.нинг турмуш ўртоғи А.Х. томонидан алимент пуллари тўланмаётгани ҳақида МИБ Бахмал тумани бўлимига бир неча бор мурожаат қилган. Шу сабабли давлат ижрочилари С.Н., А.Н. ва Э.Н. 5 август куни соат 15:30 да қарздордан 15 миллион сўм алимент қарздорликни ундириш мақсадида унинг манзилига бориб, алимент қарздорлиги учун эҳтиёждан ташқари мол-мулкларнинг хатланиши ҳақида тушунтириш берган.
Шунда қарздор А.Х. давлат ижрочисининг хизмат вазифасига фаол қаршилик кўрсатиб, С.Н.нинг елка, бел соҳаси ва қорин қисмига ошхона пичоғини санчиб, қасддан тан жароҳати етказган.
Ҳолат юзасидан А.Х.га нисбатан Жиноят кодексининг тегишли моддалари билан жиноят иши қўзғатилиб, Бахмал тумани прокуратураси томонидан тергов ҳаракатлари олиб борилмоқда. А.Х. эҳтиёт чораси сифатида қамоққа олинган.
Тан жароҳати олган давлат ижрочиси С.Н. хушмуомала ва фуқаролар билан конфликтга борадиган ходим эмас, у ҳозирда шифохонада ва аҳволи қониқарли даражада. Бюро давлат ижрочилари суд ва бошқа орган қарорларини ижро этиш орқали фуқаролар ёки жамиятлар манфаатини ҳимоя қилади. Бироқ айрим фуқароларимиз қарздорликларни ундириш ўрнига давлат хизматчиларига қўл кўтариш орқали масалани ўз томонига ҳал қилиш мумкин деб ўйлайди. Бу, албатта, нотўғри тўхтам. Чунки қарор бор экан, у ижро этилади. Бир давлат ижрочисига тўхтатиб қолинса, уни бошқаси давом эттиради, — дейилади МИБ хабарида.МИБ тизимида фуқаролар билан ишлаш ҳолати қандай?
Мажбурий ижро бюроси ташкил топган вақтда муомала маданияти ва аҳоли билан ишлашда дастлаб бир қатор камчиликларга йўл қўйилган. Фуқаролардан келаётган эътирозлар, ишга масъулиятсизлик билан ёндашган ва йўл қўйилган ножўя хатти-ҳаракатлар, шунингдек, ишнинг оғирлиги сабаб 7500 дан ортиқ ходим ишдан бўшатилган.
Ходимларнинг ҳаракатлари ҳақида нафақат расмий мурожаатлар, балки ижтимоий тармоқлардаги хабарлар(сигнал) ҳам ўрганиб борилмоқда. Ҳозирда ходимлар билан ишлашда янгича ёндашув ва қайта малакасини ошириш йўли ошириш чоралари кўриляпти. Бунда асосий эътиборни иш сифатини янада ошириш, давлат ижрочилари юкланмасини енгиллаштириш учун ахборот-коммуникация технологияларини фаолиятга татбиқ этиб борилмоқда.
Таъкидланишича, 2022 йилнинг ўтган даврида ходимларга нисбатан 20 дан ортиқ қаршилик кўрсатиш ҳолатлари аниқланган ва қонуний чоралар кўрилган.
Изоҳ (0)