Ўзбекистон элчиси Равшан Усмонов UCSI Group компаниялар гуруҳи асосчиси ва раиси Дато Питер Нг билан учрашди ва Порт-Диксон шаҳридаги UCSI Hospital кўп тармоқли тиббиёт марказига ташриф буюрди, деб хабар бермоқда «Дунё» ахборот агентлиги.
Дато Питер Нг Ўзбекистонда соғлиқни сақлаш, олий ва касб-ҳунар таълими соҳаларида амалга оширилаётган ислоҳотларни юқори баҳолади. UCSI гуруҳи раҳбари 28 июнь—1 июль кунлари Ўзбекистонга ташрифи якунлари бўйича Тошкент давлат иқтисодиёт университети ректори Қўнғратбай Шарипов билан музокаралар ўтказганидан мамнунлигини билдирди. Шу йилнинг май ойида Куала-Лумпурда имзоланган ҳамкорлик масалалари муҳокама қилинди. 2022—2023-ўқув йилида Ўзбекистондан ёш олимларни UCSI университетининг докторантура йўналишида ўқишга юбориш ва Ўзбекистон университетининг бир гуруҳ ходимлари учун Малайзиядаги мунтазам ўқув семинарларини ташкил этиш бўйича келишувга эришилди.
Таъкидланишича, сафар давомида Тошкент фармацевтика институти ва Г.V.Плеханов номидаги Россия иқтисодиёт университетининг Тошкент филиали билан ҳам қўшма таълим дастурлари ва илмий лойиҳаларни ишлаб чиқиш, профессор-ўқитувчилар алмашинувини кўзда тутувчи янги ҳамкорлик меморандумлари имзоланди. Жумладан, октябрь ойида Малайзияда ўзбек ўқитувчиларининг малакасини ошириш бўйича тренинглар ва ўқув семинарларини ташкил этиш, шунингдек, UCSI университетининг «Замонавий технологияларни ривожлантиришнинг долзарб муаммолари ва истиқболлари» халқаро илмий-амалий конференциясида иштирок этиши режалаштирилган.
Тошкент шаҳрида UCSI университети филиалини очиш ҳамда «франчайзинг» модели асосида кадрлар тайёрлаш бўйича илғор аккредитациядан ўтган ўқув дастурларини йўлга қўйиш бўйича ҳамкорлик қилиш имкониятлари ва шакллари муҳокама қилинди.
Шифохонага ташриф чоғида шифокорлар малакасини ошириш бўйича ҳамкорликни йўлга қўйиш, республика давлат ва хусусий тиббиёт муассасалари билан илғор тажриба алмашиш масалалари кўриб чиқилди.
Малайзия томони қисқа муддатли ўқув машғулотлари, семинарлар ва вебинарлар, жумладан, ўзбекистонлик шифокорлар учун операцияларни жонли трансляция қилиш, илмий-амалий конференциялар ва тиббий кўргазмаларда иштирок этиш, қўшма илмий-амалий тадқиқотлар, онлайн ва юзма-юз мулоқотлар ташкил этишга тайёрлигини билдирди.
Изоҳ (0)