«Миллий тикланиш» демократик партияси марказий кенгаши раиси Алишер Қодиров Ўзбекистон фуқаролари бошқа давлатнинг ҳарбий ҳаракатига ёлланган тақдирда, уларнинг ватанга қайтишини умрбод тақиқлаш кераклигини айтди.
«Бундай шахсларни ёлланиш расмийлаштирилган кундан эътиборан фуқаролигини бекор қилиш ва Ўзбекистонга киришини умрбод тақиқлаш керак», — деб ёзган у Telegram-каналида.
Ўзбекистон Жиноят кодексининг 154-моддаси (ёлланиш)да, хорижий давлат ҳудудидаги қуролли можароларда ёки ҳарбий ҳаракатларда қонунга хилоф равишда қатнашганлик учун 5 йилдан 10 йилгача озодликдан маҳрум қилиш жазоси белгиланган. Алишер Қодировнинг сўзларига кўра, бу таъсирсиз чорадир. Қонунчилик палатаси спикери ўринбосарининг билдиришича, қонунга тегишли ўзгартириш киритиш масаласида маслаҳатлашувлар бошланди.
Эслатиб ўтамиз, Россиянинг Перм шаҳридаги ўзбек диаспораси Украина билан урушда Россияни қўллаб-қувватловчи Амир Темур номидаги батальонни тузди. «Пермдаги Ўрта Осиё ўзбеклари жамияти» қурултойида унинг раҳбари Жаҳонгир Жалолов Россиянинг Украинани демилитаризация қилиш ва деназиялаштириш бўйича махсус ҳарбий операциясини қўллаб-қувватлаш кераклигини таъкидлаган.
Ташқи меҳнат миграцияси агентлиги ҳолатга муносабат билдириб, Ўзбекистон фуқароларидан бундай даъватларга эргашмасликни, зиддиятли ҳудудларга бормасликни ва ҳарбий ҳаракатларда иштирок этмасликни сўради.
Ўзбекистоннинг Россиядаги элчихонаси ҳам ватандошларни хорижий давлатлар ҳудудида кўнгилли батальонлар тузиш ва ёки ҳарбий ҳаракатларда иштирок этиш бўйича даъватларга берилмасликка ва эҳтиёткор бўлишга чақирди.
Изоҳ (0)