Фарғона нефтни қайта ишлаш заводининг устига бензин сепиб, ўзини ёқиб юборган ишчиси вафот этгани ҳақида хабар берилган эди.
Завод маъмурияти марҳуманинг дафн маросими билан боғлиқ барча харажатлари қопланиши, жамоа шартномаси асосида оила аъзоларига моддий ёрдам ажратилиши, марҳума фарзандларининг таълим олиш ва ҳаётда ўз ўрнини топишида амалий ёрдам берилишини маълум қилди.
«2022 йил 10 август куни ҳамкасбимиз, собиқ 32-цехнинг 1-таъмирлаш-қурилиш участкаси бўёқчиси Санобархон Ҳайдарова оғир куйиш жароҳати туфайли ҳаётдан кўз юмди.
Санобархон Ҳайдарова жорий йилнинг 2 август куни эрталаб соат 08:30 лар чамасида заводнинг 1-секторига кириш йўлагида устидан бензин қуйиб, олов ёқиб, ўз жонига қасд қилган эди. Воқеа жойида бўлган ходимларнинг тезкор ҳаракатлари билан олов дарҳол ўчирилди. Унга завод тиббиёт ходимлари томонидан биринчи ёрдам кўрсатилиб, корхона тез ёрдам автомашинасида Республика шошилинч тиббий ёрдам илмий маркази Фарғона филиалига ётқизилди.
Тиббиёт муассасасида оғир куйиш жароҳатини олган ҳамкасбимизга 2—10 август кунлари тезкор тиббий муолажалар кўрсатилди. Комбустиология бўлими мудири, даволовчи врач Д.Ориповнинг маълумотга кўра, беморга алангадан II – III АБ даражали 70 фоиз термик куйиши, куйиш карахтлиги оғир даража, юқори нафас йўлларининг I – II даражадан термик куйиши ташхиси қўйилган.
Даволаш чораларига қарамай, 10 август куни соат 07:00 ларда беморнинг умумий аҳволи ўта оғирлашди, унда артериал қон босими ва пулс аниқланмади. Зудлик билан реанимацион чора-тадбирлар олиб борилди, юрак ёпиқ усулда тўғридан-тўғри массаж қилинди.
Юқорида кўрсатилган ёрдамларга қарамасдан беморда клиник ўлим юз берди. Реанимацион ёрдамлар қайта-қайта ўтказилган бўлса-да, соат 07:05 да биологик ўлим ҳолати қайд этилди.
Беморнинг ўлимига тананинг 70 фоиз II – III АБ даражали термик куйиши, куйиш касаллиги токсемия босқичи сабаб бўлган.
Фарғона нефтни қайта ишлаш заводи раҳбарияти, бирлашган касаба уюшмаси қўмитаси, жамоат ташкилотлари ва кўп минг сонли жамоа аъзолари Санобархон Ҳайдарованинг вафоти муносабати билан унинг оила аъзолари ва яқинларига таъзия изҳор қилади.
Завод марҳуманинг дафн маросимларини ўтказиш учун боғлиқ барча харажатлари тўлиқ қопланиши, жамоа шартнома асосида оила аъзоларига моддий ёрдам ажратилиши, қарамоғида бўлган балоғат ёшидаги фарзандларига таълим олишида, ҳаётда ўз ўрнини топишида амалий ёрдам бериш вазифаларини ўз зиммасига олади», — дейилади ФНҚЗ маълумотида.
Эслатиб ўтамиз, аввалроқ марҳума оиланинг ягона боқувчиси экани, турмуш ўртоғи ишсиз ва 4 нафар қиз фарзанди борлиги маълум бўлганди.
Изоҳ (0)