Бухорода узоқ йиллар давомида эътибордан четда қолган хароба ҳовли маданий мерос сифатида рўйхатга олинадиган бўлди. Бу ҳақда «Дарё» мухбири хабар берди.
Бухоро шаҳридаги «Абдурауф Фитрат» маҳалласи, Абдулла Тўқай кўчасида жойлашган ва ташландиқ ҳолга келиб қолган ҳовли ҳудуддаги 30-сонли мактабгача таълим ташкилоти ёнида жойлашган. Ҳовлига мазкур болалар боғчаси орқали кирилади.
«Узоқ йиллар давомида эътибордан четда қолиб, харобазорга айланган ҳовлини тикан ва бегона ўтлар босган. Ҳар бир бурчагида ахлатхона пайдо бўлган. Қадимий меҳроблари, нақшинкор устунлари, том болорлари эса ҳалиям салобатини йўқотмаган. Ғиштин деворлари тўкилиб кетган бўлишига қарамай, ёғоч устунлари бақувват. Бухорода туризм ривожланаётган пайтда эътиборга муҳтож харобазорга айланган ҳовлига қараб, яшашга, ҳаётга талпинаётган, аммо, кексайган, қадди дол чолнинг сийратини кўргандек бўлдик. Кўнгил хира тортди», — дейди хароба ҳақида гапирган суҳбатдошлардан бири.
Шу атрофда яшовчи аҳолининг сўзига кўра, қаровсиз ҳовлининг ғиштлари ҳам тўкилиб тушмоқда.
«Ушбу ҳовлининг орқа тарафи шундоқ бизнинг ҳовли билан туташ. Қаровсиз уйларнинг ағнаб, тўкилиб бораётгани биз яшаб турган ҳовли деворларининг ҳам ёрилиб кетишига сабаб бўлмоқда», — дейди шу ерда яшовчи фуқаролардан бири Насиба Ибрагимова.
Вилоят маданий мерос бошқармаси бошлиғи Шоҳаббос Шарофиддиновнинг айтишича, ушбу ҳовлининг бўш ва қаровсизлиги бошқарма томонидан 2021 йил бошида аниқланган.
«Бухорода 829 та маданий мерос объекти мавжуд. Бу объект эса ҳозирча маданий мерос объекти сифатида рўйхатга олинмаган, аммо тарихий-маданий қийматга эга. Шу бўйича Маданий мерос агентлигига таклиф киритганмиз. Таклиф киритилган кундан эътиборан эса уни Маданий мерос муҳофазасига олинган, деб ҳисобласа бўлади. Ушбу қадимий маданий аҳамиятга эга объектнинг тарихий аҳамиятини йўқотмаган ҳолда реставрация қилишни мўлжаллаганмиз. Худо хоҳласа, ушбу объект халқимизга жуда бетакрор кўринишда қайта тортиқ этилади», — дейди Шоҳаббос Шарофиддинов.
Изоҳ (0)