Запорожье АЭСнинг Украина томонидан давомли ўққа тутилиши глобал техноген ҳалокатга олиб келиши мумкин, станция хавф остида турибди, деб маълум қилди Россия Миллий мудофаани бошқариш маркази бошлиғи, генерал-полковник Михаил Мизинцев.
«Запорожье АЭСда авария кузатилган тақдирда глобал техноген ҳалокат юз беради, у радиоактив ифлосланиш кўлами бўйича Чернобиль ва Фукусима АЭСларидаги авариялар оқибатларидан анча каттароқ бўлади», — деди Мизинцев.
Унинг сўзларига кўра, авария юз берган тақдирда, радиациявий ифлосланиш зонаси 5,3 минг квадрат километрдан ошади. Унга Киев, Запорожье, Харьков, Полтава, Херсон, Одесса, Николаев, Кировоград ва Винница вилоятлари, ДХР ва ЛХР, Россия, Беларусь, Болгария ва Руминиянинг чегарадош туманлари киради.
Бундан ташқари, авариядан кейин Қора ва Азов денгизлари, шунингдек, Босфор кўрфази узоқ вақтга кемалар қатнови учун яроқсиз ҳолатга келади. Туркия, Грузия, Абхазия, Болгария ва Руминия радиациянинг юқори даражаси кузатилади.
Запорожье АЭС — Европадаги энг йирик атом электр станцияси. У Энергодар шаҳрида жойлашган. 28 февраль куни, Украинада ҳарбий операция бошланганидан кейин тўрт кун ўтиб, Россия Мудофаа вазирлиги Запорожье АЭС ҳудуди назорат остига олинганини маълум қилганди.
7 август куни Энергодар ҳарбий-фуқаролик маъмурияти Украина қўшинлари тунда Запорожье АЭСга «Ураган» баравар ўт очиш реактив тизимлари билан зарбалар берганини маълум қилди. Ракета парчалари ишлаб турган энергоблок яқинига келиб тушгани даъво қилинди. Россия Мудофаа вазирлиги маълумотларига кўра, АЭС ва Энергодар ҳудудига Украина томонидан 152 миллиметр калибрли 20 та снаряд отилган.
«АЭСда 3-энергоблок қурилмаларининг бир қисми токдан узилиб қолди, 4-энергоблок ишлаб чиқараётган қувват камайди, водород қувурига зарар етди, водород станциясида водороднинг аланга бўлиб ёниши юз берди», — деб Россия мудофаа идораси электр станциясига етган зарарни изоҳлаган эди.
Аввалроқ Россия ҳукумати Халқаро атом энергияси агентлиги (МАГАТЭ) раҳбариятига делегациянинг АЭСга ташрифини ташкиллаштиришда ёрдам беришга тайёрлигини билдирган эди. БМТ бош котиби Антониу Гутерриш МАГАТЭ инспекторларига электр станциясига кириш имкониятини беришга чақирган ва унга берилган зарбаларни «ўз жонига қасд қилиш» деб атаган эди. Айни вақтда Россия ТИВ БМТ котибиятини ташрифга тўсқинлик қилишда айбламоқда (МАГАТЭ БМТ раҳбарлиги остида ишлайди).
Изоҳ (0)