Латвия яна Россиядан газ ола бошлади. Аввалроқ «Газпром» қоидалар бузилиши туфайли газ етказиб беришни тўхтатганди

Латвия Россия гази импортини қайта тиклади, деб ёзади Meduza Латвиянинг табиий газни ташиб келтириш ва сақлаш бўйича оператори Conexus Baltic Grid’га таяниб.

Газ Латвияга «Валдай — Псков — Рига» газ қувури билан Эстониядаги «Лухамаа» газ ўлчаш станцияси орқали кириб келмоқда.

Россиядан Латвияга газ етказиб бериш 5 август куни қайта бошланган, деб аниқлик киритди «ТАСС» Европа газ транспорти тизимлари оператори маълумотларига таяниб.

29 июль куни Латвия баҳорда тўхтатилган Россия гази хариди қайта бошланганини эълон қилганди. Шу билан бирга, Latvijas gaze оператори қайд этишича, ёнилғи бевосита «Газпром»дан эмас, воситачилар орқали сотиб олинмоқда, унинг учун тўлов эса Россия рублида эмас, балки еврода амалга оширилмоқда.

30 июль куни «Газпром» Латвияга газ етказиб беришни «газни танлаб олиш шартлари бузилиши» туфайли тўхтатди. «Газпром» айнан қандай қоидабузарликлар ҳақида гап бораётганига аниқлик киритмади.

Латвия ҳукумати 2023 йилдан бошлаб Россия табиий газидан бутунлай воз кечмоқчи.