Бугун,

  • USD 11014.01
  • RUB 191.8
  • EUR 10674.78

Тошкент шаҳри Чилонзор туманида катта дарахтларнинг илдизига шикаст етказилгани ҳақида хабар берилганди. Бош прокуратура томонидан реконструкция қилиш жараёнида дарахтларга зарар етказилгани ҳолати текширилди.

Фото: Telegram

Фото: Telegram

Қайд этилишича, мутахассислар томонидан Чилонзор шоҳкўчасидаги қурилиш ҳудудида мавжуд бўлган 108 та дарахт аҳволи ўрганилган. Ўрганишда 7 та эман дарахтининг томир қисми очилиши оқибатида шикаст етказилгани ҳамда дарахтлар хавф остида қолгани аниқланди.

Мутахассисларнинг маълумотига кўра, ушбу ҳолатда зудлик билан чоралар кўрилмаган тақдирда шикаст етказилган дарахтлар қуриши оқибатида табиат ва атроф муҳитга 348,9 миллион сўм зарар етказилишига олиб келиши мумкинлиги кўрсатилган.

Мазкур ҳолат юзасидан Жиноят кодексининг 198-моддаси 3-қисми (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилиб, тергов ҳаракатлари олиб борилмоқда.

Шунингдек, Тошкент шаҳри ҳокимлиги ҳам ҳолат юзасидан муносабат билдирди.

Ўрганишлар натижасида ижтимоий тармоқларда айтилганидек, 100 та дарахтга эмас, балки 7 та дарахт илдиз тизимининг уст қисмига қисман зарар етказилгани маълум бўлди ва зудлик билан уларни қутқариш чора-тадбирлари белгилаб олинди. Хусусан, Ўзбекистон Фанлар академияси Ботаника институти ҳузуридаги Тошкент ботаника боғи бўлим бошлиғи Атиргул Холмирзаеванинг кўрсатмаларига биноан, уч қисмдан иборат бўлган ер таркибининг икки қисмини биогомус, қолган бир қисмини қум билан аралаштирган ҳолда тўлдириш кераклиги таъкидланди. Илдизлари очилиб қолган қисмларга фитоспарин, майда илдизларнинг ўсиб кетиши учун корневин препаратлари тавсия этилди. Дарахтларнинг илдизларини озиқлантириш учун микроэлементли гуматни сув билан тўйинтириб, суғориш кераклиги айтиб ўтилди, — дейилади муносабатда.
Тошкент шаҳри ҳокими томонидан масъулларга лойиҳадаги олти чизиқли автомобиль йўли ўрнига тўрт чизиқли автомобиль йўлини қолдириш, ортиб қолган жойни эса яшил ҳудудга айлантириш топшириғи берилди. Жаҳонгир Ортиқхўжаев шаҳар прокурорига ушбу лойиҳада қўйилган хатоликлар учун лойиҳа институтити, қурувчилар, экология бўлими ва, умуман, ушбу лойиҳада қатнашган барча мутасаддиларга чора кўрилиши зарурлигини таъкидлади.

Аввалроқ катта дарахтлар илдизига шикаст етказган ташкилотга 261 миллион сўм жарима белгиланганди.

Изоҳ
Асосий янгиликлар