Тошкент шаҳридаги Миллий матбуот марказида 3 август, чоршанба куни кураш спорт тури бўйича мутасаддилар ва турли ОАВ вакиллари иштирокида матбуот анжумани бўлиб ўтди, дея хабар беради «Дарё» мухбири.
Анжуманнинг асосий мавзуси 24 июль куни Францияда бўлиб ўтган Ўзбекистон президенти соврини учун кураш бўйича халқаро турнир якунлари ва келгусида режалаштирилаётган мусобақалар хусусида бўлди.
Париж шаҳрида бўлиб ўтган мусобақада дунёнинг 30 га яқин давлатидан ташриф буюрган полвонлар ғолиблик учун кураш олиб борган. Франция, Германия, Италия, Греция, Туркия, Украина, Бельгия, Швейцария, Қозоғистон, Ўзбекистон, Испания ва бошқа давлатлардан ташриф буюрган спортчилар мутлақ вазн тоифасида гиламга чиққан. Эйфель минораси остида бўлиб ўтган мазкур турнирда ўзбекистонлик Муҳаммадкарим Хуррамов олтин медални қўлга киритди.
Ўзбекистон президенти соврини учун кураш Франциядан ташқари Германия, Туркия ва Болгария давлатларида ҳам бўлиб ўтган.
«2023 йил Польшада III ‘Европа ўйинлари’ бўлиб ўтади. Ушбу нуфузли мусобақа дастурига курашни кўргазмали чиқиш сифатида қўшиш сифатида мусобақа ташкил қўмитаси томонидан қўллаб-қувватланмоқда», – дейди Ўзбекистон МОҚ Кураш миллий спорт турини ривожлантириш бўлими бошлиғи Камол Усмонов.
Бундан ташқари 2022 йилнинг сентябрь—октябрь ойларида АҚШ, Польша, Миср каби мамлакатларда ҳам кураш бўйича халқаро турнирлар ўтказилиши кўзда тутилган.
Изоҳ (0)