«Толибон»нинг қора олтини: Афғонистонда болалар меҳнати ёрдамида кўмир қазиб олиш кўпайди

Financial Times газетаси «Толибон» келганидан кейин Афғонистон оммавий кўмир қазиб олишга қайтганини ҳақида маълум қилди.

Украинадаги уруш ва логистика билан боғлиқ муаммолар фонида хом ашё нархларининг ўсиши билан Афғонистоннинг кўмир конларида иш жадаллашди.

Халқаро изоляция ва санкциялар туфайли вайрон бўлган иқтисодни қайта тиклаш муаммосига дуч келган «Толибон» учун кўмир муҳим даромад манбаига айланди.

«Толибон» бахтига улар келгандан сўнг кўмир нархи кескин ошди, — деди маҳаллий ишчи Маланг.

«Толибон» келганидан сўнг Афғонистон кескин таназзулга учради. Иқтисодиётни ривожлантириш учун янги ҳокимият экологик ва ахлоқий муаммоларни четга суриб, кўмир экспортини оширди.

Ҳозир қора олтинининг катта қисми тоғли йўллар орқали Кобулга ва ундан кейин Покистонга ёки Хитойга юборилади.

Олдинги ҳукумат яшил иқтисодиётга ўтиш бўйича ишларни бошлаган, аммо «Толибон» қазиб олинадиган ёқилғига қайтган.

Иқтисодни яшиллаштириш режалари барбод бўлди, — деди БМТнинг Афғонистон бўйича Тараққиёт дастури раҳбари Абдуллоҳ ал-Дардорий.

Financial Times Афғонистонда кўмир оғир шароитда қазиб олинаётганини таъкидлайди. Мисол учун, Наҳрайнда ўсмирлар ва болалар арзимаган маош эвазига ишлайди. Барча ишлар қўлда, асбоб-ускуналар ва ҳимоя воситаларисиз амалга оширилади.

Болалар меҳнати Афғонистонда деярли ҳар доим бўлган, бироқ «Толибон» келиши ва мамлакатда иқтисодий инқироз бошланганидан бери шахталарда ишлайдиган болалар сони кескин ошган.

Мамлакатда кўмир ва бошқа фойдали қазилмалар кўп. Баъзи ҳисоб-китобларга кўра, литийдан тортиб то қимматбаҳо тошларгача бўлган барча қазилмаларнинг умумий қиймати 1 триллион долларга етади.

Аммо беқарор вазият қидирув ва қазиб олишни чеклаб қўйди. Хитой, Россия ва бошқа мамлакатлар сармоядорлари билан кон қазиб олиш бўйича битимлар тузиш бўйича музокаралар олиб борилмоқда, лекин ҳозирча иш асосан норасмий савдогарлар ҳисобидан молиялаштирилмоқда.