Financial Times gazetasi “Tolibon” kelganidan keyin Afg‘oniston ommaviy ko‘mir qazib olishga qaytganini haqida ma’lum qildi.
Ukrainadagi urush va logistika bilan bog‘liq muammolar fonida xomashyo narxlarining o‘sishi bilan Afg‘onistonning ko‘mir konlarida ish jadallashdi.
Xalqaro izolyatsiya va sanksiyalar tufayli vayron bo‘lgan iqtisodni qayta tiklash muammosiga duch kelgan “Tolibon” uchun ko‘mir muhim daromad manbaiga aylandi.
“Tolibon” baxtiga ular kelgandan so‘ng ko‘mir narxi keskin oshdi, — dedi mahalliy ishchi Malang.
“Tolibon” kelganidan so‘ng Afg‘oniston keskin tanazzulga uchradi. Iqtisodiyotni rivojlantirish uchun yangi hokimiyat ekologik va axloqiy muammolarni chetga surib, ko‘mir eksportini oshirdi.
Hozir qora oltinining katta qismi tog‘li yo‘llar orqali Kobulga va undan keyin Pokistonga yoki Xitoyga yuboriladi.
Oldingi hukumat yashil iqtisodiyotga o‘tish bo‘yicha ishlarni boshlagan, ammo “Tolibon” qazib olinadigan yoqilg‘iga qaytgan.
Iqtisodni yashillashtirish rejalari barbod bo‘ldi, — dedi BMTning Afg‘oniston bo‘yicha Taraqqiyot dasturi rahbari Abdulloh al-Dardoriy.
Financial Times Afg‘onistonda ko‘mir og‘ir sharoitda qazib olinayotganini ta’kidlaydi. Misol uchun, Nahraynda o‘smirlar va bolalar arzimagan maosh evaziga ishlaydi. Barcha ishlar qo‘lda, asbob-uskunalar va himoya vositalarisiz amalga oshiriladi.
Bolalar mehnati Afg‘onistonda deyarli har doim bo‘lgan, biroq “Tolibon” kelishi va mamlakatda iqtisodiy inqiroz boshlanganidan beri shaxtalarda ishlaydigan bolalar soni keskin oshgan.
Mamlakatda ko‘mir va boshqa foydali qazilmalar ko‘p. Ba’zi hisob-kitoblarga ko‘ra, litiydan tortib to qimmatbaho toshlargacha bo‘lgan barcha qazilmalarning umumiy qiymati 1 trillion dollarga yetadi.
Ammo beqaror vaziyat qidiruv va qazib olishni cheklab qo‘ydi. Xitoy, Rossiya va boshqa mamlakatlar sarmoyadorlari bilan kon qazib olish bo‘yicha bitimlar tuzish bo‘yicha muzokaralar olib borilmoqda, lekin hozircha ish asosan norasmiy savdogarlar hisobidan moliyalashtirilmoqda.
Izoh (0)