Россия мудофаа вазири ўринбосари Александр Фомин чет эл ҳарбий атташелари учун брифингда маълум қилишича, уруш бошланганидан буён Россия ва Украина ҳарбий асирлар ва ҳалок бўлган ҳарбий хизматчиларнинг жасадларини айирбошлаш бўйича 27 та операция ўтказган, деб ёзади Meduza.
Россия томони уруш бошланганидан бери асирлар билан айирбошлаш юзасидан жуда камдан-кам изоҳ беради: Россия Мудофаа вазирлиги расмий брифингларда бир мартагина — 30 июнь куни — айирбошлашувни тилга олганди. Ўз навбатида, Украина томони айирбошлаш жараёнлари ҳақида бир неча марта хабар берган.
Вазир ўринбосари маълум қилишича, Москва ва Киев ўртасидаги мулоқот Халқаро қизил хоч қўмитаси иштирокида йўлга қўйилган.
Фомин қўшимча қилишича, Россия Мудофаа вазирлигида касал ва ярадор ҳарбий асирларни текширувдан ўтказиш учун тиббий комиссия амал қилиб, у Женева конвенцияси асосидаги тавсиялар ва тамойилларга мувофиқ иш олиб боради. Украинага ушбу комиссия қарори билан 18 киши берилган, деди вазир ўринбосари.
Россия ва Украина ўртасида ҳарбий асирлар билан биринчи «тўла-тўкис» айирбошлашув 24 март куни «10 га 10» формуласи бўйича бўлиб ўтганди. Охирги марта «144 га 144» формуласи бўйича 29 июнь куни айирбошлашув бўлганди. Украиналик асирларнинг кўпчилигини «Азовсталь» ҳимоячилари ташкил қилади.
Ҳалок бўлганларнинг жасадлари билан биринчи расмий айирбошлашув 2 июнда бўлиб ўтганди. Ўшанда «160 га 160» формуласи бўйича келишилган. Ўшандан буён яна бир неча марта айирбошлашув бўлиб ўтган, сўнггиси эса 26 июлга тўғри келган.
Изоҳ (0)