Италия Молиявий гвардияси Геленжик (Россияда Қора денгиз бўйича жойлашган курорт-шаҳар) яқинидаги «Путин саройи»нинг меъмори Ланфранко Чириллога тегишли 141 миллион еврога тенг активларни хатлади, деб ёзади Meduza Италия ОАВларига таяниб.
Хатланган мол-мулк рўйхатига уйлар, вертолёт, банк активлари, нақд пуллар, қимматбаҳо тақинчоқлар, шунингдек, санъат асарлари, шу жумладан, Пикассо, Сезанн ва Кандинский асарлари кирди.
Молиявий гвардия хабарига кўра, мол-мулкнинг хатланиши солиқ қонунбузарликлари, пул ювиш ва активларнинг сохта равишда берилиши ҳақидаги иш доирасида амалга оширилган. Меъмор 2013 йилдан 2019 йилгача ўнлаб миллион евро даромади ҳақида декларация бермаганликда гумонланмоқда. У буни бошқа мамлакат резидентлигини сохта равишда расмийлаштириш орқали амалга оширган бўлиши мумкин.
Пресс-релизда айтилишича, суриштирув Брешиа провинциясида Россияда рўйхатга олинган ва божхона жараёнларидан ўтмаган вертолёт аниқланганидан кейин бошланган.
Ланфранко Чириллога нисбатан суриштирув ҳақида 2022 йил февралида маълум бўлганди. Ўшанда унга тегишли бўлган санъат асарлари ва вертолёт хатлангани хабар берилганди. У 20 йилдан ортиқ вақт давомида Россияда яшагани ва ҳукуматга «ўз позициясини тушунтириб ўтирмаслиги»ни айтганди. La Repubblica ёзишича, Чирилло «қанчадир вақт аввал» Дубайга кўчиб ўтган . Ҳозир у қаердалигига аниқлик киритилмаяпти.
Ланфранко Чирилло Россияда 1990 йиллар бошидан 2010 йиллар ўрталаригача фаол иш олиб борган; Владимир Путиннинг фармони билан унга Россия фуқаролиги берилган. «Путин саройи»ни Чирилло, ўз сўзларига кўра, Россия президенти учун эмас, балки «Стройгазконсалтинг» компанияси учун лойиҳалаштирган.
Алексей Навальнийнинг Коррупцияга қарши кураш фонди 2021 йил 19 январда «Путин учун сарой. Энг катта пора тарихи» фильмини тармоққа юклади. Қаср ҳудудида казино, чилимхона, омбор, ўйин автоматлари ва бошқа кўнгилочар масканлар мавжуд.
Изоҳ (0)