Rossiya mudofaa vaziri o‘rinbosari Aleksandr Fomin chet el harbiy attashelari uchun brifingda ma’lum qilishicha, urush boshlanganidan buyon Rossiya va Ukraina harbiy asirlar va halok bo‘lgan harbiy xizmatchilarning jasadlarini ayirboshlash bo‘yicha 27 ta operatsiya o‘tkazgan, deb yozadi Meduza.
Rossiya tomoni urush boshlanganidan beri asirlar bilan ayirboshlash yuzasidan juda kamdan-kam izoh beradi: Rossiya Mudofaa vazirligi rasmiy brifinglarda bir martagina — 30-iyun kuni — ayirboshlashuvni tilga olgandi. O‘z navbatida, Ukraina tomoni ayirboshlash jarayonlari haqida bir necha marta xabar bergan.
Vazir o‘rinbosari ma’lum qilishicha, Moskva va Kiyev o‘rtasidagi muloqot Xalqaro qizil xoch qo‘mitasi ishtirokida yo‘lga qo‘yilgan.
Fomin qo‘shimcha qilishicha, Rossiya Mudofaa vazirligida kasal va yarador harbiy asirlarni tekshiruvdan o‘tkazish uchun tibbiy komissiya amal qilib, u Jeneva konvensiyasi asosidagi tavsiyalar va tamoyillarga muvofiq ish olib boradi. Ukrainaga ushbu komissiya qarori bilan 18 kishi berilgan, dedi vazir o‘rinbosari.
Rossiya va Ukraina o‘rtasida harbiy asirlar bilan birinchi “to‘la-to‘kis” ayirboshlashuv 24-mart kuni “10 ga 10” formulasi bo‘yicha bo‘lib o‘tgandi. Oxirgi marta “144 ga 144” formulasi bo‘yicha 29-iyun kuni ayirboshlashuv bo‘lgandi. Ukrainalik asirlarning ko‘pchiligini “Azovstal” himoyachilari tashkil qiladi.
Halok bo‘lganlarning jasadlari bilan birinchi rasmiy ayirboshlashuv 2-iyunda bo‘lib o‘tgandi. O‘shanda “160 ga 160” formulasi bo‘yicha kelishilgan. O‘shandan buyon yana bir necha marta ayirboshlashuv bo‘lib o‘tgan, so‘nggisi esa 26-iyulga to‘g‘ri kelgan.
Izoh (0)