3 август куни Тоғли Қорабоғдаги вазият яна кескинлашди. Бу ҳақда ҳудудда бўлиб турган Россия тинчликпарвар кучлари хабар берди.
Контингентнинг тинчликни сақлаш бўйича жавобгарлик зонасида вазият кескинлашди. Сарибаба тепалиги ҳудудида Озарбайжон қуролли кучлари томонидан ўт очишни тўхтатиш режими бузилди», — дейилади Россия Мудофаа вазирлигининг Тоғли Қорабоғ ҳудудидаги Россия кучлари фаолияти тўғрисидаги баёнотида.«Россия тинчликпарвар контингенти қўмондонлиги Озарбайжон ва Арманистон томонлари вакиллари билан биргаликда вазиятни барқарорлаштириш чораларини кўрмоқда», — таъкидланган мудофаа вазирлиги хабарида.
Озарбайжон Мудофаа вазирлигининг хабар қилишича, 3 август куни Озарбайжон армияси «Қасос» жавоб операциясини ўтказган, унинг давомида Қорабоғдаги бир қатор тепаликлар назоратга олинган ва ноқонуний арман қуролли гуруҳларининг бир қанча жанговар позициялари йўқ қилинган.
Арманистоннинг ноқонуний қуролли тузилмалари аъзолари Келбажар ва Лочин туманлари ҳудудини қамраб олган тоғ тизмасида жойлашган Гирхғиз чўққисини эгаллаб, у ерда янги жанговар позицияларни жиҳозлашга ҳаракат қилаётганди. Озарбайжон армияси бўлинмалари томонидан ўтказилган «Қасос» жавоб операцияси натижасида Кичик Кавказнинг Қорабоғ тизмаси бўйлаб Гирхғиз чўққиси, шунингдек, Сарибаба ва бошқа муҳим тепаликлар назорат остига олинди » — дейилади вазирлик баёнотида.Унда қайд этилишича, операция давомида бир қанча жанговар позициялар, жангарилар, гаубицалар, ҳарбий техника ва катта миқдордаги ўқ-дорилар йўқ қилинган.
Мудофаа вазирлигининг таъкидлашича, «Озарбайжон Республикаси Россия тинчликпарвар кучлари вақтинча жойлашган Озарбайжон ҳудудларида уч томонлама баёнотга зид равишда Арманистон қуролли кучлари ва ноқонуний арман қуролли тузилмаларининг мавжудлиги хавф манбаи эканини бир неча бор таъкидлаган»
Ушбу ҳудудларни демилитаризация қилиш, арман қўшинларининг у ердан тўлиқ олиб чиқиб кетилиши ва ноқонуний арман қуролли тузилмаларини қуролсизлантириш мутлақо муқаррар», — дейди вазирлик.Европа Иттифоқи расмийлари Тоғли Қорабоғдаги можаро тарафларини зудлик билан ҳарбий ҳаракатларни тўхтатиб, музокараларни давом эттиришга чақирди.
Вазиятни тинч ҳал қилиш йўлларини топиш учун кескинликни пасайтириш, ўт очишни тўхтатиш режимига тўлиқ риоя қилиш ва музокаралар столига қайтиш зарур», — дейилади Европа ташқи сиёсат хизмати баёнотида.
Изоҳ (0)