Бухоролик ҳайдовчи радардан қочиш учун автомобилининг давлат рақамини ўзгартирди

Бухоро вилоятининг Ғиждувон туманида радардан қочиш учун автомобилининг давлат рақамини алмаштирган ҳайдовчи ушланди. Бу ҳақда «Дарё»га вилоят ИИБ ЙҲХБ ахборот хизмати бошлиғи, капитан Улуғбек Шукруллаев хабар берди.

Таъкидланишича, Ғиждувон туманида яшовчи фуқаро Ж.Ж. анча вақтдан буён фойдаланмаган Ваз-21 011 «Жигули» машинасининг 80 К 152 ОА давлат рақам белгисини бошқарувидаги Lacetti’га ўрнатган.

Ҳолат вилоят Йўл ҳаракати хавфсизлиги бошқармаси, йўл-патруль хизмати отряди ҳамда 3-сафарбарлик инспекторлари гуруҳи томонидан ўтказилган назорат тадбирида фош бўлган. Ҳолат юзасидан тегишли тартибда маъмурий баённома расмийлаштирилиб, автомашина вақтинча сақлаш учун жарима майдончасига келтирилган.

«Ҳайдовчи транспорт воситалари давлат рақам белгисини алмаштириш қонунга хилофлигини била туриб, бу ишга қўл урган. У бу хатти-ҳаракати билан йўлларда жорий қилинган радарлардан давлат рақам белгисини ноқонуний ўзгартириш билан қутилишни ўйлаган», — дейди  Улуғбек Шукруллаев.