Нидерлансия ва Франциянинг аксарият ҳудудларида рекорд даражадаги жазирама туфайли чучук сув танқислиги кузатилмоқда, ҳукумат алоҳида режимни жорий қилди, у, шу жумладан, сув истеъмолини қисқартиришни кўзда тутади, деб ёзади «РБК».
Нидерлания инфратузилма ва сув манбалари вазири Марк Харберс маълум қилишича, «қурғоқчилик оқибатида миллий эҳтиёжлар мамлакатга дарёлар орқали ва ёмғирлар натижасида келиб тушаётган сув ҳажмидан ошиб кетган».
Унинг сўзларига кўра, бундай вазият муайян давр мобайнида сақланиб туради, бу эса яқин орада чучук сув тақсимоти бўйича янги чоралар киритилиши мумкинлигини англатади. Вазир, шунингдек, одамларни «машина ювиш ёки шиширилма ҳовузни тўлдиришдан аввал яхшилаб ўйлаб кўришга» чақирди.
Сув етишмовчилиги кутилаётганини билдирувчи хавфнинг биринчи даражаси мамлакатда 13 июль куни киритилган эди. Энди хавф даражаси иккинчи босқичгача кўтарилди, бу эса етишмовчилик ҳолатини англатади.
Францияда ҳам қурғоқчилик туфайли махсус режим жорий қилинди, у мамлакатдаги 96 та қитъа департаментларининг барчасига тегишли бўлди. Огоҳлантиришнинг биринчи даражаси йўллар, тротуарларни тозалаш, яшил майдонларни суғоришни чеклашни, шунингдек, маиший сув истеъмолини қисқартиришни кўзда тутади. Айни пайтда мамлакатда навбатдаги ўн кунлик иссиқ ҳаво тўлқини кутилмоқда.
Аномал иссиқ ҳаво сўнгги ҳафталарда ғарбий Европанинг кўпроқ қисмида қайд этилмоқда: хусусан, Португалияда ҳарорат 46,3 даражагача, Испанияда эса 42 даражагача етди. Португалия, Италия, Франция, Грецияда жазирама кучли ўрмон ёнғинларига олиб келди. Экспертлар ҳодисаларни иқлим ўзгариши билан боғламоқда.
Изоҳ (0)