Ижтимоий тармоқларда Андижон вилоятининг Олтинкўл туман тиббиёт бирлашмаси раҳбарияти иш вақтида ҳамшираларни мажбурий меҳнатга жалб этгани айтилган хабар тарқалди. «Дарё» мухбири мазкур ҳолатга аниқлик киритиш мақсадида Олтинкўл туман тиббиёт бирлашмаси бошлиғи Азаматжон Мамажонов билан боғланди.
«Мустақиллик байрами олдидан вилоятимиз бўйлаб ‘Ободонлаштириш ва кўкаламзорлаштириш ойлиги’ ўтказилмоқда. Шу муносабат билан барча ташкилотларнинг техник ходимлари томонидан тегишли ишлар амалга оширилмоқда. Жумладан, бирлашмага қарашли барча тиббиёт муассасаларида ҳам техник ходимлар томонидан белгиланган иш вақтларида тозалаш ва бошқа ишлар амалга оширилмоқда. Ижтимоий тармоқларда 4 август куни ‘ҳамширалар иш жойида эмас, ободонлаштиришга жалб қилинган’, деган хабар тарқалди.
Эшитган чоғимиздаёқ, ушбу масалани зудлик билан ўрганишга киришдик. Ўрганиш давомида ҳақиқатан ҳам туман кўп тармоқли марказий поликлиника ҳудудида ободонлаштириш ишлари олиб борилганлиги, ушбу ишларга фаррошлар ва бошқа техник ходимлар жалб қилинганлиги аниқланди. Ўзингиз биласиз фаррошларимиз, яъни халқ тилида айтганда ‘санитаркаълар ҳам иш вақтида белгиланган оқ формаларда юришади. Шу ‘санитаркаъларимиз тозаловга чиққанларида алмаштиришга эриниб, оқ халатда иш қилган. Ободонлаштириш ишларига шифокорлардан ҳам, ҳамширалардан ҳам бирортаси жалб қилинмаган. Аксинча улар ўз хоналарида беморларни кўрикдан ўтказишаётган бўлган. Шундай бўлса-да ушбу жараёнда қатнашган ва хатога йўл қўйган поликлиниканинг икки нафар катта ҳамширасига нисбатан жазо чоралари кўрилиши белгиланган.
Бундан ташқари тумандаги барча тиббиёт муассасалари раҳбарларидан ходимларини мажбурий меҳнатга жалб қилмаслик талаб қилиниб, агарда мана шундай хатоларга йўл қўйилган тақдирда жазога тортилиши бўйича тушунтиришлар берилмоқда», — дейди туман тиббиёт бирлашмаси бошлиғи Азаматжон Мамажонов.
Изоҳ (0)