Сенат раиси: Давлат қарзига оид қонун ижроси назоратда бўлади ва доимий мониторинг қилинади

Давлат қарзига оид қонун ижроси назоратда бўлади ва доимий мониторинг қилинади. Бу ҳақда бугун, 4 август куни бўлиб ўтаётган парламент юқори палатаси ялпи мажлисида Сенат раиси Танзила Норбоева маълум қилди, дея хабар бермоқда «Дарё» мухбири.

Сенатда «Давлат қарзи тўғрисида»ги қонун муҳокама қилинди. Мажлис жараёнида Танзила Норбоева Ҳисоб палатаси вакилига «Ҳисоб палатаси олдига қўйилган вазифаларни бажариш жараёнида бу соҳада қандай тизимли камчиликларни аниқлаган ва бу камчиликларга йўл қўймаслик ва уларни бартараф этиш учун ушбу қонун нормалари – механизмлар етарлими?», деган савол билан мурожаат қилди.

Ҳисоб палатаси вакилининг маълум қилишича, давлат қарзи сифатида олинган маблағлар қандай сарфланаётгани таҳлилий ўрганиб чиқилмоқда. Амалга оширилаётган лойиҳалар бўйича сарфланаётган маблағлар ҳақидаги маълумотлар парламентга ҳам тақдим этилган. Бу борада айрим камчиликларга йўл қўйилмоқда. Лойиҳани амалга ошириш бўйича тегишли гуруҳлар бор. Лекин улар малака ва тажрибага эга эмас. Вазирлик ва идораларда ички назорат тизимлари яхши йўлга қўйилмаган. Буларнинг олдини олиш учун таклифлар тайёрланди.

Мазкур қонун ҳақиқатан ҳам мамлакатимиз ривожининг бугунги босқичида ниҳоятда муҳим аҳамиятга эга. Кўзланган мақсадларга эришишда ички имкониятлар билан бир қаторда ташқаридан ҳам молиявий ресурсларни жалб қилиш бутун дунё давлатларида кенг тарқалган тажриба ҳисобланади.

Президентимиз таъкидлаганидек: «ташқи қарз ҳаммага ҳам берилавермайди, бунинг учун мамлакатнинг ташқи дунёдаги нуфузи ва унга нисбатан ишонч бўлиши керак». Ўзбекистон халқаро ҳамжамият кўз ўнгида ислоҳотларга интилувчи давлат, ишончли ҳамкор сифатида намоён бўлмоқда. Бироқ шундай бўлсада, ҳар соҳада аниқ ҳисоб-китоб ва табиийки мустаҳкам ҳуқуқий асос бўлиши керак. Шу маънода, «Давлат қарзи тўғрисида»ги қонун ушбу йўналишдаги ишларимизнинг тўғри, ҳаққоний, манфаатли ва албатта очиқ, шаффоф бўлишига хизмат қилади. Қонунда давлат қарзини бошқариш бўйича парламент ваколатлари ҳам белгиланяпти.

Давлат қарзини бошқариш стратегияси амалга оширилиши, жалб қилинган маблағлардан мақсадли ва самарали фойдаланилиши, лойиҳалар натижадорлиги каби муҳим жиҳатлар доимий диққат марказимизда бўлади. Бу масала маҳаллий кенгашларнинг ҳам назоратида бўлиши керак. Бу катта ишонч ва ҳар биримиздан алоҳида масъулият ва фаоллик талаб қилишини ўйлайманки ҳар бирингиз тўғри англаб турибсиз. Шундай экан, мен яна бир бор барчангизни мамлакатимиз, хусусан ҳудудларни ижтимоий-иқтисодий ривожлантиришга доир дастурий вазифаларнинг ижро этилиши ҳолатларига бефарқ бўлмасликка чақириб қоламан. Қонун қабул қилинганидан кейин унинг ижроси билан боғлиқ тадбирларни мониторинг қилиб боришимиз керак.

Танзила Норбоева, Олий Мажлис Сенати раиси