Сенатнинг 29-ялпи мажлисида «Уй-жой кодексини тасдиқлаш тўғрисида»ги қонун муҳокама қилинди. Бу ҳақда «Дарё» мухбири хабар бермоқда.
Мажлисда кодексни ишлаб чиқишда қатор ижобий мақсадлар кўзлангани, аммо ҳужжатда айрим нормаларни қўллаш механизмлари етарлича очиб берилмагани таъкидланди. Жумладан, маҳаллий давлат ҳокимияти органларининг давлат уй-жой фондидаги турар жойларни юридик шахсларга белгиланган мақсадда фойдаланиш учун ижара шартномаси шартлари асосида бериш ваколатини амалга ошириш тартиби белгиланмаган. Бу эса ҳокимият ваколатларини суистеъмол қилиш ва бошқа коррупцион ҳолатларга шарт-шароитлар яратиб беради.
Муҳокама жараёнида Сенат раиси Танзила Норбоева мазкур кодекс бўйича фикрларини билдирди.
«Қонунлар халқимиз ҳаётини енгиллаштиришга, одамларимиз манфаатларига хизмат қилиши керак. Ҳар бир инсон қонунни ўқиб, унинг ҳақ-ҳуқуқлари қай даражада ҳимояланганлиги аниқ қилиб кўрсатилиши керак. Ҳозир маърузада ҳам эшитдингиз, Уй-жой кодексида 90 дан ортиқ ҳаволаки норма мавжудлиги айтилди.
«Норматив ҳуқуқий ҳужжатлар тўғрисида»ги қонунга кўра, қонунларда ҳаволаки нормалар бўлиши мумкин. Лекин уларнинг қўлланилиши асосли ва мақсадга мувофиқ бўлиши керак. Бу жуда муҳим талаб. Бироқ афсуски, кодексни тайёрлаш жараёнида бу жиҳатга етарлича эътибор қаратилмаган – таҳлил қилинмаган. Қолаверса, ҳаволаки нормалар эртага тор идоравий манфаатларга хизмат қиладиган воситага айланиб қолиши мумкин. Амалиётда бундай ҳолатларни кўп кўряпмиз», – деди Сенат раҳбари.
Маълум қилинишича, мулкдорлар билан шартнома асосида турар жой бузилиши ва унинг ўрнида янги турар жой қурилиши мумкинлиги, шартнома нотариал тартибда тасдиқланиши ва турар жойни қуриш учун зарур рухсатнома олинганидан кейин кучга кириши кодексда акс эттирилган бўлса-да, шартноманинг қайси тури ҳақида сўз юритилаётганлиги мавҳум қолган. Мазкур масалалар шартномавий ҳуқуқий муносабатларни тартибга солувчи «Фуқаролик кодекси»да ҳам ўз аксини топмаган. Шу билан бирга, қонунчилик техникаси қоидаларига лозим даражада риоя қилинмаган. Баъзи нормалар бир-бирига зид. Қатор моддалар билан давлат органларига дискрецион (чекланмаган) ваколатлар берилган ҳамда кодексда қўлланилган бир қатор ҳаволаки нормалар етарли асосларга эга эмас. Ўз навбатида, ушбу ҳолатлар турли салбий оқибатларга олиб келиши мумкин.
Муҳокама якунида кодекс жамият учун муҳим бўлган ижтимоий-иқтисодий муносабатларни тартибга солишини инобатга олиниб, миллий қонун ҳужжатлари, илғор хорижий мамлакатлар тажрибаси ва ҳуқуқшунос олимлар фикрларини чуқур таҳлил этилган ҳолда, кодексни такомилига етказиш мақсадга мувофиқ деб топилди. Шу боис, кодекс сенаторлар томонидан рад этилди.
Изоҳ (0)