Қозоғистонда январь воқеалари муносабати билан очилган ишлар бўйича 92 киши турли қамоқ муддатларига ҳукм қилинган. Бу ҳақда 1 август кунги брифингда Қозоғистон Бош прокуратурасининг Махсус прокурорлар хизмати бошлиғи ўринбосари Нурлибек Сабитов маълум қилди, деб ёзади Asia Plus.
18 июль куни прокуратура тергов версияси бўйича «ҳукумат вакилларига нисбатан зўравонлик қилиш, мол-мулкни йўқ қилиш билан боғлиқ оғир жиноятларни амалга оширган», «зарарни қопламаган ва судланиб, ҳукм амалга оширилмаган» 83 нафар судланувчи ҳақиқий муддатларга ҳукм қилингани ҳақида хабар берганди.
Нурлибек Сабитовнинг сўзларига кўра, январь воқеалари бўйича судларга жами 474 та жиноий иш йўналтирилган, 717 киши судланган.
Прокуратура маълумотларига кўра, мингдан ортиқ киши «оммавий тартибсизликлар» ва «терроризм актлари» ҳақидаги ишлар бўйича гумонланмоқда.
Ҳозир 2089 дона ўғирланган қуролнинг жойлашган жойи номаълум бўлиб қолмоқда. Полиция томонидан яна 1936 та қурол мусодара қилинган, уларнинг кўпчилигида рақамлар ўчириб ташланган бўлиб, энди январь воқеаларида қўлланилган-қўлланилмагани бўйича идентификациядан ўтмоқда.
Полиция томонидан январь воқеалари бўйича жами 4,6 мингдан зиёд жиноят иши қўзғатилган. Шуларнинг 2,5 мингдан ортиғи — ўғирликлар, 708 таси қурол ўғирлаш ёки сақлаш, 418 таси — безорилик, 199 таси мол-мулкни йўқ қилиш, 26 таси — босқинчилик ва талаш ҳолатларидир.
Терговчилар томонидан 15 мингдан зиёд одам сўроқ қилинган.
Қозоғистонда йил бошидаги ҳукуматга қарши норозиликлар мамлакатнинг энг янги тарихидаги энг кучли зўравонлик ва қирғинни келтириб чиқарди. Ҳукумат «ташқаридан бўлган тажовуз» ва хорижда тайёрланган «террорчилар» «ҳужумлари» ҳақида маълум қилди, аммо ишончли далилларни келтирмади.
Қозоғистон президенти Қосим-Жўмарт Тўқаев хавфсизлик кучларига огоҳлантирмасдан тегизиб отиш ҳақида буйруқ берганини ўзи маълум қилди. Хавфсизлик кучлари ўт очиши оқибатида, расмий маълумотларга кўра, 232 киши ҳалок бўлган, яна олти киши қўлга олинганидан кейин қийноқлар қурбонига айланган.
Ҳалок бўлганлар орасида болалар ҳам, марказий майдонлар ёнидан ўтиб кетаётган тасодифий ўткинчилар ҳам, ўша кунлари блокпостларга қўйилган ҳарбийлар ҳам бўлган. Минглаб одамлар қўлга олинган, юзлаб кишилар ҳибс остида қийноқларга солингани ва қаттиқ дўппосланганидан шикоят қилган.
Ҳукумат, ҳуқуқ ҳимоячиларининг қурбонлар исм-шарифларини эълон қилиб, улар қандай ҳолатларда ўлим топгани ҳақида маълумот тақдим этишга оид даъватларига қарамай, ҳалок бўлганлар рўйхатини эълон қилмади. Халқаро ҳуқуқни ҳимоя қилиш ташкилотлари Нур-Султонни адолатли ва шаффоф суриштирув ўтказиб, халқаро экспертларни таклиф этишга чақирди, Нур-Султон бу даъватларни рад этди.
Изоҳ (0)