1 август куни эрталаб Украина дони билан Серра-Леоне байроғи остида Одесса портидан жўнаб кетган Разони юк кемаси Истанбулга етиб келди. Бу ҳақда Туркия мудофаа вазирлиги маълум қилди, дея хабар бермоқда Euronews.
Маккажўхори ортилган кема Қора денгиздан Босфор бўғозига етиб келган ва белгиланган жойга лангар ташлаган. Кема текширувдан ўтказилмоқда.
Уруш бошланганидан буён илк бор Разони юк кемаси «дон йўлаги»ни муваффақиятли кесиб ўтди. У Босфордан ўтиб, Триполи (Ливан) портига йўл олади. Кема бортида Украинадан 26 минг тонна маккажўхори олиб кетмоқда, Одесса портида озиқ-овқат юкланган яна 16 та кема денгизга чиқишни кутмоқда.
Аввалроқ Туркия Мудофаа вазирлиги ҳозирда Украинанинг учта порти дон ортилган кемаларни денгизга чиқаришга тайёрланаётгани ҳақида хабар берган эди. Вазирликнинг таъкидлашича, Қўшма мувофиқлаштириш маркази юк кемасининг йўналиш бўйлаб ўтишини онлайн режимида кузатиб боради.
Изоҳ (0)