Нэнси Пелоси Тайван парламентига ташриф буюрди ва маъмурият раҳбари билан учрашди

2 август куни кечқурун Тайванга етиб келган АҚШ Вакиллар палатаси спикери Нэнси Пелоси қисман тан олинган давлат парламентига ташриф буюрди, деб ёзади «РБК» маҳаллий телевидениега таяниб.

«Биз дўст сифатида келдик, минтақада тинчлик ўрнатиш мақсадида келдик», — деди у. Пелоси орол раҳбариятига меҳмондўстлик учун миннатдорлик билдириб, Тайванни «дунёдаги энг эркин жамиятлардан бири» деб атади ва Вашингтон Тайбей билан парламентлараро мулоқотни фаоллаштириш истагида эканини айтди. У «АҚШ ва Тайван ўртасида иқтисодий ҳамкорлик учун кўпроқ имкониятлар пайдо бўлишига умид билдирди. Шунингдек, Пелосининг айтишича, АҚШ Тайванни қўллаб-қувватлаши керак, чунки орол Пекин томонидан кучайиб бораётган таҳдидларга дуч келмоқда.

Тайван қонун чиқаурвчи мажлиси спикери ўринбосари Сай Сичан Пелосини «Тайван халқининг катта дўсти» деб атади. Унинг делегацияси ташрифи «демократия ва эркинлик қадриятлари ҳимояси»дан гувоҳлик беради», деди у.

Парламентга ташрифидан кейин у Тайван маъмурияти раҳбари Сай Инвен билан учрашиб, АҚШ делегацияси оролга уни қўллаб-қувватлашга содиқлигини тасдиқлаш учун келганини айтди: «Биз вақт синовидан ўтган дўстлигимиздан фахрланамиз». Инвен спикерга қўллаб-қувватлаганлик учун миннатдорлик билдириб, «Тайван ҳарбий таҳдидлар қаршисида чекинмаслиги»га ваъда берди.

Пелоси ўз ташрифининг асосий мақсади Тайвандаги «ёрқин ва динамик» демократияни қўллаб-қувватлаш эканини айтди. У оролга Осиё турнеси доирасида етиб келди; ушбу ташриф ҳақида олдиндан эълон қилинмаган.

Пекин 1949 йилда Хитойдан мустақил бўлиб ажралиб чиққанини эълон қилган оролни ўз ҳудуди деб ҳисоблайди. Хитой ҳукумати Пелосининг ташрифини кескин танқид қилиб, Пелоси атайлаб провокация уюштиргани ва «ягона Хитой» тамойилини бузганини маълум қилди. Хитой Ташқи ишлар вазирлиги АҚШ «ўт билан ўйнашаётгани»ни маълум қилди. Вазирлик фикрича, Вашингтоннинг хатти-ҳаракатлари «Хитой суверенитети ва ҳудудий яхлитлигини жиддий равишда бузиб, Тайванда тинчлик ва барқарорликка путур етказган».

Хитой ҳукумати Тайван қирғоқлари яқинида катта кўламли ҳарбий машғулотлар ҳақида эълон қилди. Орол давлат Мудофаа вазирлиги маълум қилишича, манёврлар Пекин минтақада тинчлик ва барқарорликни йўқ қилишга интилаётганидан дарак беради.

АҚШ ҳукумати таъкидлашича, Пелосининг ташрифи «ягона Хитой» тамойилига зид эмас ва АҚШнинг Хитойга нисбатан сиёсати ўзгарганини англатмайди. Оқ уй маълум қилишича, Вашингтон Пекиннинг жавоб чоралари кўришини кутмоқда ва уларга жавоб қилишга тайёр, аммо инқирозли вазиятни юзага келтирмоқчи ва Хитой билан низога киришмоқчи эмас.