Кореянинг янги сайланган президенти Ўзбекистон билан йўлга қўйилган сиёсатни аввалгидек давом эттириш ниятида. Бу ҳақда Сенат раиси Танзила Норбоева Корея билан эришилган келишувлар ижросини таъминлаш юзасидан ўтказилган йиғилишда маълум қилди, дея хабар бермоқда «Дарё мухбири.
Танзила Норбоеванинг айтишича, Корея билан муносабатлар аввалгидек давом этиши билдирилган бўлса-да, Ўзбекистон вазирлик ва идоралари икки томонлама эришилган келишувлар бўйича самарали ишламаяпти.
«Кореянинг янги сайланган президенти Ўзбекистон билан йўлга қўйилган сиёсатни аввалгидек давом эттириш ниятида. Муносабатларда ҳеч қандай ўзгаришлар бўлмайди. Ҳамкорлик кучайса кучаядики, бошқа томонга силжишлар кузатилмайди. Вазирлик ва идоралар Корея билан эришилган келишувлар бўйича амалий ҳаракатларни танқидий кўриб чиқиши керак.
Давлат раҳбарининг 2021 йил 28 декабрдаги қарори билан тасдиқланган 3 та амалий ҳаракатлар режаларида жами 116 та банддаги вазифаларнинг 5 таси бажарилган, 77 таси ўз вақтида бажарилмоқда, 34 тасининг (29 фоизи) ижроси кечиктирилмоқда. «Йўл харита»ларнинг ижро ҳолатини қониқарли деб бўлмайди», – деди Сенат раиси.
Танзила Норбоеванинг таъкидлашича, 3-илова билан тасдиқланган «йўл харита»си ижросига Инвестициялар ва ташқи савдо вазирлиги масъул. Аммо вазирлик келишувда кўрсатилган лойиҳаларни ўз ҳолига ташлаб қўйган.
«Муаммонинг сабабларини ўрганиш ва бартафар этиш бўйича амалий ҳаракатлар кўринмаяпти. Вазирлик киритган маълумотига кўра, 40 та инвестиция лойиҳадан 10 таси қолоқлик билан амалга ошириляпти. Муаммонинг сабаблари келтирилмаган, таклифлар эса номига (белгиланган вазифани бажариш ҳақида) берилмоқда. Бизнинг ўрганишларимиз эса, қолоқлик билан амалга оширилаётган лойиҳалар сони кўплигини кўрсатмоқда, яъни 21 та лойиҳа ўз вақтида бажарилмаяпти», – деди Сенат раҳбари.
Аввалроқ Танзила Норбоева Фарғона вилоятининг айрим ҳудудлари чегаралари ўзгартирилиши режалаштирилаётганини маълум қилганди.
Изоҳ (0)