Ўзбекистон ҳукумати Фарғона вилоятининг айрим ҳудудлари чегараларини ўзгартириш юзасидан парламентга сўров юборди. Бу ҳақда Сенат раиси Танзила Норбоева Корея билан эришилган келишувлар ижросини таъминлаш юзасидан ўтказилган йиғилишда маълум қилди, дея хабар бермоқда «Дарё» мухбири.
Танзила Норбоеванинг айтишича, парламентга вилоятдаги 6 та туман ва 3 та шаҳар чегараларини ўзгартириш бўйича ҳужжатлар тақдим этилган.
«Фарғона вилояти ҳокимлиги томонидан Қўқон шаҳрида замонавий турар жой бинолари барпо этиш учун ер ажратиш масаласида ҳукумат қарори лойиҳаси ишлаб чиқилган. Таҳлилларга кўра, Қўқон шаҳрида замонавий турар жойни қуриш учун ажратилаётган ер майдони айни пайтда Данғара туманига қарашли. Ушбу масалани ечими сифатида мазкур ер майдонини Қўқон шаҳар ҳудудига ўтказиш таклифи билдирилган.
Ҳукумат томонидан Фарғона вилоятининг айрим ҳудудлари чегараларини, яъни Учкўприк, Ўзбекистон, Данғара, Қўштепа, Тошлоқ, Фарғона туманлари ҳамда Қўқон, Марғилон, Фарғона шаҳарлари чегараларини ўзгартириш юзасидан парламентга ҳужжатлар тақдим қилиниб, сўров юборилган. Мазкур масала Қонунчилик палатасида қабул қилингандан кейин Сенатда кўриб чиқилади» – деди Сенат раиси.
Аввалроқ Сенат ялпи мажлисида Қашқадарё вилояти Чироқчи туманининг чегараларини ўзгартириш ва Кўкдала туманини ташкил этиш тўғрисида қарор қабул қилинганди.
Изоҳ (0)