Наманган вилояти Чуст туманидаги 64-сонли давлат мактабгача таълим ташкилотида 2022 йил 1 август куни тилини чайнаб юборган 5 ёшли вафот этди. Мактабгача таълим вазирлиги ҳолат юзасидан маълумот берди.
Дастлабки ўрганиш бўйича мактабгача таълим ташкилоти директори, МТТ ҳамшираси, тарбиячи, ёрдамчи тарбиячининг сўзларига кўра, 2017 йилда туғилган А.Ш. жорий йилнинг 1 август куни эрталаб МТТга қабул қилинган. Таълимий фаолиятга яхши қатнашган. Кун тартибига кўра тушлик қилган ва гигиена қоидаларига амал қилгач, барча тарбияланувчилар қатори ухлашга ётган.
Тарбиячи уйқудан уйғониш вақти бўлганда аввал қиз болаларни, сўнгра ўғил болаларни ҳожатга олиб чиқиш учун уйқудан уйғотган. Лекин бола бошини кўтарган ва яна ётиб олган. Қизларни ҳожатдан олиб келиб, А.Ш.ни уйғотган. Шунда бола тилини чайнаб юборганини кўрган ва зудлик билан ҳамширанинг олдига биринчи ёрдам кўрсатиш учун кўтариб олиб чиққан.
МТТ ҳамшираси болага биринчи тиббий ёрдамни қилиб, зарурий муолажаларни амалга оширган ва тез тиббий ёрдамга хабар берган. Тиббиёт ходимларининг ҳаракатларига қарамай, бола вафот этган. Ўлим ҳақидаги маълумотномага асосан Ж22 қуйи нафас йўлларининг аниқланмаган ўткир респиратор инфекцияси; Ж81 ўпка шишиши ўлим сабаби этиб кўрсатилган.
Ушбу ҳолат юзасидан 2 август куни вилоят Мактабгача таълим бошқармаси тезкор гуруҳи томонидан дастлабки ўрганиш ўтказилган ҳамда тегишли маълумотлар ва ҳужжатлар тўпланган.
Ҳозирда ҳолат юзасидан тергов ишлари амалга ошмоқда. Тергов якуни бўйича қўшимча маълумот берилади.
Изоҳ (0)