Европа ташқи сиёсат хизмати (EBC) расмий вакили Евроиттифоқнинг Бағдодда давом этаётган норозилик намойишлари ва уларнинг кучайишидан хавотирда эканини маълум қилди.
«Биз зўравонликлар давом этишининг олдини олиш учун барча томонларни вазминлик кўрсатишга чақирамиз. Сиёсий кучлар конституциявий асосда конструктив сиёсий мулоқот орқали муаммоларни ҳал қилиши керак», — дейилади EBC вакилининг 31 июль куни Брюсселда чоп этилган коммюникесида.
Ҳужжатда таъкидланишича, «тинч намойиш ўтказиш ҳуқуқи демократия учун муҳим бўлса-да, қонунлар ва давлат институтлари ҳурмат қилиниши лозим».
Ироқнинг нуфузли шиа имоми Муқтада ас-Садр тарафдорлари Ироқнинг янги бош вазири тайинланишига қарши норозилик билдирган ҳолда 30 июль куни, бир ҳафтада иккинчи марта Бағдоднинг «яшил ҳудуди»даги парламент биносига бостириб кирган — ушбу ҳудудда Ироқ давлат муассасалари ва бир қатор хорижлик элчихоналар жойлашган.
Бағдоддаги норозилик намойишлари 27 июль куни, амалдаги бош вазир Мустафо ал-Казимийнинг зудлик билан тарқалиш чақириғига қарамай, бир неча юзлаб намойишчилар парламент биносига бостириб кирганида бошланган эди.
Айни дамда Ироқда 2021 йил октябрь ойида мамлакатда сайловлар ўтказилгандан бери энг йирик норозилик намойишлари бўлиб ўтмоқда. Намойишчилар Эрон томонидан қўллаб-қувватланадиган шиа партиялари бошчилигидаги Мувофиқлаштирувчи тузилма блокидан Муҳаммад ал-Суданий номзодининг бош вазир лавозимига кўрсатилишига қарши чиқмоқда.
Изоҳ (0)