Ўз-ўзини мустақил деб эълон қилган Косовода хавфсизликни таъминлаш учун масъул бўлган НАТО раҳбарлигидаги халқаро кучлар (KFOR) Косово барқарорлигига нисбатан хавф туғилган тақдирда, Белград ва Приштина ўртасидаги чегара низосига аралашишга тайёр. Бу ҳақда ташкилотнинг Twitter’даги баёнотида айтилади.
«Агар Косово шимолида барқарорлик хавф остида қолса, KFOR аралашишга тайёр», — дейилади хабарда.
Ташкилот қайд этишича, Косово шимолидаги ҳудудларда хавфсизлик билан боғлиқ вазият кескин бўлиб қолмоқда, аммо KFOR доимий кузатув олиб бормоқда ва БМТ Хавфсизлик кенгашининг 1999 йилги 1244-резолюцияси доирасида аралашишга тайёр. «НАТО раҳбарлиги остидаги KFOR миссиямиз БМТнинг бутун Косово аҳолиси учун хавфсиз шароитлар ва ҳаракатланиш эркинлигини таъминлаш бўйича ўз мандатини кундалик бажаришига қаратилган», — дейилади хабарда.
Kosovo Force (KFOR) — НАТО бошчилигидаги халқаро миссия бўлиб, қисман тан олинган республикадаги барқарорлик учун жавоб беради. 1999 йилдан буён фаолият олиб боради.
31 июль куни кечқурун Приштинанинг серб ҳужжатларини тан олмаслик ҳақидаги қарори фонида Косово шимолида вазият кескинлашди, одамлар баррикадалар қура бошлади, ўқ овозлари эшитилди. Шунда Сербия президенти Александр Вучич Косово ярим тунга яқин косоволик сербларга қарши операция бошламоқчилигини айтди.
Вазият ёмонлашуви фонида Вучич Сербия Бош штабига етиб келди, Косово ҳукумати эса мамлакатнинг шимолий туманларида полицияни сафарбар этди.
Бош штабдаги йиғилиш якунларига кўра, Вучич халқаро ҳамжамиятни Косово ҳукуматига таъсир ўтказишга чақирди ва вазият тез орада ҳал бўлишига умид билдирди.
Косово ҳукумати Сербия билан чегарада вазиятнинг кескинлашувига сабаб бўлган, қисман тан олинган республика ҳудудида серб ҳужжатларининг амал қилишини тўхтатиш тўғрисидаги қонун қабул қилинишини 1 сентябргача кечиктириш ҳақидаги қарорини эълон қилди.
Илгари Косово Сербия таркибидаги мухтор республика бўлган, аммо 2008 йилда ўзини мустақил деб эълон қилган. Уни Евроиттифоқ мамлакатларининг аксарияти ва БМТга аъзо давлатларнинг юздан ортиғи тан олган. Россия, Хитой, Эрон, Сербия ва бошқа бир қатор мамлакатлар Косовони алоҳида давлат сифатида тан олмаган.
Изоҳ (0)