Ҳиндистонда маймунчечак учун топширган тести мусбат чиққан йигит касалхонада вафот этди. Бу ҳақда Ҳиндистоннинг Керала штати соғлиқни сақлаш департаменти раҳбари Вина Жорж маълум қилди, деб ёзмоқда The Индиан Express.
Унинг сўзларига кўра, Керала штатининг Триссур шаҳридан бўлган 22 ёшли йигит 22 июль куни Бирлашган Араб Амирликларидан қайтганидан бир неча кун ўтиб, хусусий шифохонада вафот этган. Беморда вирус у хорижда пайти аниқланган, бироқ унинг оила аъзолари тест натижаларини 30 июлга келибгина Ҳиндистон касалхонасига топширган.
«У энсефалит белгилари билан касалхонага ётқизилди. Унинг қариндошлари шанба кунига келибгина тест натижасини топширди. Ўлим ҳолати бўйича тергов ўтказилади», — деди Жорж.
Нашрнинг таъкидлашича, йигитнинг дафн маросими маймунчечак қурбонлари протоколига мувофиқ бўлиб ўтган. Бундан ташқари, сўнгги кунларда у билан алоқада бўлган барча шахслар мутахассисларнинг қаттиқ назоратига олинган.
Изоҳ (0)