Мьянма ҳарбийлари мамлакатда 2021 йилнинг 1 февралидан бери амал қилаётган фавқулодда ҳолат тартибини яна олти ойга узайтирди. Бу ҳақда Global New Light of Myanmar газетаси Миллий мудофаа ва хавфсизлик кенгаши баёнотига таяниб, хабар берди.
«Кенгаш аъзолари Конституциянинг 425-моддасига мувофиқ эълон қилинган фавқулодда ҳолатни яна олти ойга узайтириш тўғрисида муваққат президент Мин Свенинг таклифини бир овоздан қўллаб-қувватлади», — дейилади баёнотда.
2021 йилнинг 1 февралида Мьянмада ҳокимият ҳарбийлар қўлига ўтганди. Ўша куни мамлакат парламенти иш бошлаши, яъни ҳукуматнинг янги таркибини тасдиқлаши керак эди. Армия ўзининг сиёсий вазиятга аралашувини парламент сайловлари пайтида сайловчилар рўйхатининг сохталаштирилгани ва шу сабабли бошланган тартибсизликлар билан изоҳлади.
Изоҳ (0)