Жорий йил 6 ойи давомида Наманганда фаолият юритаётган корхона ва компаниялар 15,6 миллион долларлик товарларни «божхона ҳудудида қайта ишлаш» тартибида расмийлаштирди. Улардан 5,7 миллион долларга тенг қайта ишланган тайёр маҳсулотлар реэкспортга йўналтирилган. Бу ҳақда Давлат божхона қўмитаси томонидан Наманганда ўтказилган медиа тур давомида маълум қилинди, дея хабар беради «Дарё» мухбири Азизбек Абдувалиев.
Таъкидланишича, ўтган йили ушбу кўрсаткичлар тегишли равишда 902,9 минг доллар ва 1,26 миллион долларга тенг бўлганди.
Рақамларга кўра, маҳаллий тадбиркорлар охирги 1,5 йил давомида хориждан жами 26,5 миллион долларлик турли технологик асбоб-ускуналарни импорт қилган. Бу товарларни қайта ишлаш учун катта имконият ҳисобланади.
Тадбирда қайд этилишича, ривожланган мамлакатлар ташқи савдосида «божхона ҳудудида қайта ишлаш» тартибининг салмоғи юқори ҳисобланади. Жумладан, қайта ишланган маҳсулотларнинг умумий экспортдаги улуши Хитойда 35 фоизни (872 миллиард доллар), Европа Иттифоқида 10 фоизни (256 миллиард доллар), Туркияда эса 41 фоизни (65 млрд доллар) ташкил этади.
Ўзбекистонда мазкур йўналишда юқори кўрсаткичларга эришишда давлат раҳбарининг жорий йил 25 апрелдаги «Божхона ҳудудида қайта ишлаш» божхона режимини қўллашни соддалаштиришга доир қўшимча чора-тадбирлар тўғрисида»ги фармони муҳим рол ўйнамоқда.
«Фармон билан товарларни қайта ишлаш операциялари рўйхати қадоқлаш, ўраш, саралаш, тозалаш, бошқа товарларга мослаштириш ва ускуналарни модернизация қилиш хизматлари билан тўлдирилди. Энг катта енгиллик шундаки, мазкур жараёнларни амалга оширишда тадбиркорлар умуман божхона тўловлари тўламайди.
Товарлар экспортида қўлланиладиган божхона йиғимлари ставкалари, имтиёз, преференция, субсидия ва компенсациялар қайта ишлашдан ҳосил бўлган тайёр маҳсулотлар реэкспортига ҳам татбиқ этилмоқда. Товарларни қайта ишлашда мувофиқлик сертификати, санитария-эпидемиологик хулоса, божхона тўловлари таъминоти талаб этилмайди.
Авваллари товарларни ушбу тартибда расмийлаштиришда товар импортида қандай ҳужжатлар талаб қилинган бўлса, худди шундай йўл тутиларди», — дейди Давлат божхона қўмитаси Божхона назоратини ташкил этиш бош бошқармаси бошлиғи Рустам Қобулов.
«Божхона ҳудудида қайта ишлаш» божхона режимининг афзалликлари: имконият ва қулайликлар» мавзусидаги медиа тур давомида тадбиркорлар ва ОАВ вакилларининг кўплаб саволларига Божхона қўмитаси мутасаддилари томонидан батафсил жавоб берилди. Билдирилган фикр-мулоҳаза ва таклифлар қайд этиб борилди.
Мавзуга доир: Ўзбекистонда йилнинг биринчи ярмида бюджетга қанча миқдорда божхона тўлови ундирилгани маълум қилинди
Изоҳ (0)