Бухоро вилоятида 2022 йилнинг ўтган даврида 2021 йилнинг шу даврига нисбатан босқинчилик ва автомобиль ўғирлаш жинояти кўпайган. Бу ҳақда вилоят ИИБ бошлиғи Шуҳрат Алиев иштирокидаги матбуот анжуманида маълум қилинди, дея хабар берди «Дарё» мухбири.
Маълум бўлишича, кеча вилоят ИИБ бошлиғи иштирокида ОАВ вакиллари ва блогерлар учун матбуот анжумани ташкил этилган.
«Бухорода 2022 йилнинг олти ойи мобайнида 2165 та жиноят содир этилган. Бу рақам жиноятлар сони ўтган йилгига нисбатан 9,08 фоиз камайганини кўрсатаётган бўлса-да, жиноятчилар сони 1791 нафарни кўрсатиб, ўтган йилгига нисбатан 381 кишига кўпайганини англатмоқда. Жиноий жавобгарликка тортилганлар эса 358 тага ошган. Айниқса, аёллар ўртасида содир этилган жиноятларнинг 37 тага, ёшлар ўртасида 106, вояга етмаганлар ўртасида 6 тага, мактаб, коллеж ўқувчилари орасида 4 тага кўпайгани ачинарли», — дейди Шуҳрат Алиев.
Таъкидланишича, босқинчилик 3 тадан 6 тага, автотранспорт воситаларини олиб қочиш 7 тага кўпайган. Оғир тан жароҳати етказиш ва номусга тегиш жиноятлари ҳам ўтган йилнинг мос даврига нисбатан барқарор сақланган. Юқорида қайд этилган жиноят ва маъмурий ҳуқуқбузарликлардан жабр чеккан, тазйиқ ва зўравонликдан жабрланган 2172 нафар хотин-қизга ҳимоя ордери берилган.
«Ҳимоя ордери бериш ва профилактик тадбирлар натижасида 2095 та оила яраштирилди, 804 та оиладаги низолар бартараф этилди. Берилган ҳимоя ордери қоидаларига риоя қилмаган 87 нафар фуқаро маъмурий жавобгарликка тортилди. Бундан ташқари, ижтимоий ҳимояга муҳтож аёлларнинг 2254 нафари ишга жойлаштирилди. 1566 нафарига тиббий ёрдам кўрсатилиб, 2012 нафарига моддий ёрдам берилди. 145 нафар зўрлик ишлатилишидан жабр кўрган шахслар реаблитация қилиш марказларига жойлаштирилди», — деди Шуҳрат Алиев.
Изоҳ (0)