Афғонистонда ўтган йил августида ҳокимият тепасига «Толибон» ҳаракати келганидан кейин ИШИД террорчилик гуруҳи таркиби ошган. Бу ҳақда Россия президентининг Афғонистон бўйича махсус вакили Замир Кабулов маълум қилди, деб ёзади «РБК».
Унинг сўзларига кўра, уларнинг сони 6 минг киши деб баҳоланмоқда, толиблар энди ҳокимият тепасига келган пайтда эса улар тахминан 2 минг кишини ташкил қиларди, бироқ толиблар келгунига қадар ИШИД аъзолари сони 10 минг нафардан ошган. «Уч карра кўпайиш бўлди. Бу Афғонистондаги вазият ривожланишининг энг салбий жиҳатидир», — деди Кабулов.
Дипломатнинг фикрича, Афғонистонда толиблар ҳукуматига қарши ҳаракатлар давом этаётганига қарамасдан, ҳозир «жорий ҳокимиятга қарама-қаршилик яратиши мумкин бўлган куч йўқ». «Толибон» мамлакатни бошқаришни ўрганишда давом этмоқда, ҳақиқий этносиёсий инклюзив ҳукумат яратиш зарурлиги уларга «қийинчилик билан бўлса-да, етиб бормоқда», бироқ улар ҳозирча ғолиблар тоифаси билан фикрлашда давом этиб, ўзларини мамлакатни мустақил бошқаришга муносиб деб ҳисобламоқда, деди Кабулов.
«Гуманитар ёрдам мамлакатга кичик партиялар билан етказилиб, халқаро кўмак маблағлари музлатилган ҳолатда турган бир пайтда, ‘Толибон’ кўкнор етиштирилишига қарши курашолмайди», — дея давом этди Кабулов. Толиблар эса мамлакатни наркотиклардан озод қилишга ваъда берганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)