«Дарё»га мурожаат қилган бухоролик аёл Дилором Жўраева 2014 йилдан буён фарзанди таъминоти учун олиши лозим бўлган алимент пуллари миқдори 82 миллиондан ортгани, аммо МИБнинг Бухоро шаҳар бўлими ижрочиси пулларини ундириб бермаётганини айтди. «Дарё» мухбири мурожаатни ўрганди.
«Икки нафар ўғлим бор. 2013 йил охирларида турмуш ўртоғим билан ажрашдик. 2014 йилда фарзандларимга алимент ундирув учун фуқаролик ишлари бўйича Бухоро туманлараро судига ариза билан мурожаат қилганман. Унга асосан, икки нафар вояга етмаган фарзандларим таъминоти учун турмуш ўртоғимнинг ойлик даромадининг 1/3 қисми миқдорида алимент ундирилиши тўғрисида суд буйруғи чиқди. Бироқ, ҳеч қандай ундирув амалга ошириб берилмади. Ҳалигача пайсалга солиб келинмоқда», — дейди мурожаатчи аёл.
Мажбурий ижро бюросининг вилоят бошқармаси матбуот хизмати раҳбари Ихтиёр Олимовнинг сўзига кўра, фуқаро Дилором Жўраева 2014 йилда икки нафар фарзанди таъминоти учун собиқ турмуш ўртоғи Феруз Бобоқуловдан алимент ундириш бўйича Суд ижро департаментига мурожаат қилган, МИБ томонидан эса 2017 йилдан бери барча ижро ишлари ҳужжатлари бирма-бир инвентаризациядан ўтказилмоқда.
«Тўғриси, суд ижро департаменти фаолияти даврида қилинган ушбу мурожаат ҳақиқатан ҳам эътибордан четда қолган. Яъни, Мажбурий ижро бюроси ўз фаолиятини 2017 йилда бошлаган. Алимент ундирувчи шахс эса ўз аризасини 2014 йилда суд ижро департаментига ёзган. Мурожаатнинг электрон эмас, ҳужжатлар шаклида ўтгани боис, бу борада камчиликлар учраган ва улар бартараф этилмоқда. Бундан ташқари, алимент ундириш учун фуқаро Феруз Бобоқулов шахсий биометрик паспортини расмийлаштирмагани учун унга нисбатан ‘МИБ портал’ электрон дастури орқали қидирув эълон қилиш имконияти ҳам мавжуд эмас», — дейди Ихтиёр Олимов.
«Дарё» мухбири Дилором Жўраева билан телефон орқали мулоқотда бўлиб, қарздорнинг Москва вилояти, Ленин раёни, Видное шаҳрида ишлаб келаётганига ойдинлик киритган.
«Собиқ турмуш ўртоғим яшаётган ушбу манзилни ҳам, унинг телефон рақамини ҳам МИБга маълум қилганман. У билан бир неча бор боғланишган, манзилига аниқлик киритишган, аммо алимент ундирув учун қидирувга берилиши керак экан, қидирувга бериш учун эса эримнинг биометрик паспортида муаммо борлигини такрорлашмоқда. Наҳотки, ҳужжатларни расмийлаштириш ёхуд қарздордан қарзни мажбурий ундириш ўн йилдан ортиқ вақт талаб қилса», — дейди Дилором Жўраева.
МИБнинг Бухоро шаҳар бўлими давлат ижрочиси Ҳалимжон Жамолов мазкур ижро ҳужжати юзасидан Ўзбекистон Республикаси «Суд ҳужжатлари ва бошқа органлар ҳужжатларини ижро этиш тўғрисида»ги қонуннинг 23-моддасига мувофиқ, ижро иши юритишни қўзғатиш тўғрисида қарор қабул қилиниб, қарор нусхаси почта алоқа бўлими орқали тарафларга юборилганини билдирган.
«Олиб борилган мажбурий ижро ҳаракатлари давомида давлат ижрочиси томонидан қарздор Феруз Бобоқуловнинг Ўзбекистон Республикасидан чиқиш ҳуқуқлари вақтинча чекланган. Шунингдек, унинг яшаш манзилини кўздан кечириш мақсадида бир неча бор ота-онасининг яшаш манзилига борилганда, қарздор тахминан 2009 йилда Россия Федерациясига ишлаш мақсадида кетгани аниқланди. Ҳозирда эса у Ўзбекистон Республикасининг биометрик паспортига ҳам эга эмас. Доимий рўйхатда туриш манзили йўқлиги боис электрон дастур орқали ҳам қидирув эълон қилиш имконияти бўлмаяпти. Агар қарздор ушбу муаммосини ҳал этмаса, қонуннинг 421-моддасига асосан, унга нисбатан қонуний чора кўрилиб, қидирув эълон қилиш тартиби белгиланади», — дейди Ҳалимжон Жамолов.
12 йилдан буён ҳар хил важлар билан эътибордан четда қолиб келаётган ҳолат собиқ эр-хотин ўртасида янада чигал муаммоларнинг авж олишига туртки бўлган.
Дилором Жўраева 13 йиллик турмуши давомида оилада фароғат топмагани, турмуш ўртоғи ва унинг оиласидагилар оғир вазиятларда қолганда, улар учун ўз имзоси билан бошқалардан йирик миқдорда қарз олгани, уни тўлаш учун хорижга ишлаш учун жўнаб кетишга мажбур бўлгани ва бу қарзларни ҳам ўзи ишлаб, қайтарганини билдирган.
«Кенжа фарзандимни онамнинг қарамоғига қолдириб, 2001 йилда туғилган тўнғичим билан Россияга келиб, ишлашга мажбур бўлдим. Бу даврда ўғлим вояга етди. Баркамол бўлди. Куч-қувватга тўлиб, 21 ёшни қаршилади. Ўзини ўзи эплайди. Ҳатто отасининг таъминотига муҳтож эмаслигини билдириб, унинг алиментидан воз кечди. Лекин мен кенжамнинг келажак таъминоти учун отасидан алимент пулини ундиришга ҳақлиман. Ота эса ўз ҳаёти билан банд, фарзандларининг тақдири уни қизиқтирмай қўйган», — дейди аёл.
«Дарё» мухбири билан суҳбатда бўлган Феруз Бобоқулов эса собиқ турмуш ўртоғининг ёлғон гапираётганини, алимент тўлови ҳақида уни ҳеч ким огоҳлантирмагани ва бу ҳақда энди эшитаётганини билдирган.
«Қўни-қўшнилардан мен ёки ота-онам учун эмас, ўз эҳтиёжлари учун катта миқдорда қарз олган. Ўз чиқимлари учун олиб, айбни бизга юклаяпти, у аввалдан пулни яхши кўрган. Фарзандларим масаласига келадиган бўлсак, ўзидан ҳам азбаройи фарзандларим учун қўнғироқ қилиб, ҳол-аҳвол сўраб тураман. Алимент тўламаган бўлмасам ҳам, уларга иқтисодий кўмак бериб келганман. Катта ўғлим эса доим ўзим билан. Онаси фарзандига қарамайди. Москвага келганидан буён ўғлим мен билан, ишини топиб бераман, жойини топиб бераман, касал бўлса, шифокорга обораман. Бу ёрдам эмасми? Яна нима қилишим керак? Ўғлим билан бошқа-бошқа жойда ишласак ҳам, онаси эмас, ўзим хабардорман доим. Онаси нима қиляпти экан?» — дейди ота.
Феруз Бобоқуловнинг сўзига кўра, бир ой аввал МИБ ижрочиси унга қўнғироқ қилиб, алимент қарздорлиги 82 миллион сўмдан ошгани ҳақида билдирган.
«Мен тушунмаяпман, қайси жараён орқали менга шунча катта миқдорда алимент қарздорлиги чиққан? Шу менга қизиқ», — дейди у.
«Икки фарзанд учун 12 йилдан буён алимент ундируви амалга оширилмаган. Катта фарзанд эса ўз хоҳиши билан алиментдан воз кечган. Ўзбекистон Республикаси Оила кодексининг 140-моддасига кўра, агар алимент тўлаши шарт бўлган шахс алимент қарзлари ҳисобланаётган даврда ишламаган бўлса ёки унинг иш ҳақи ва даромадини тасдиқловчи ҳужжатлар тақдим қилинмаган бўлса, алимент қарзи ундирилаётган вақтдаги ўртача ойлик иш ҳақи миқдори бўйича ҳисоблаб чиқилади. Шунга асосан, 2014 йил 3 ноябрдан 2022 йил 1 июнга қадар бўлган давр учун ушбу қарздорлик 82 миллион 64 минг 508 сўм деб ҳисобланган», — деди Ҳалимжон Жамолов.
Маълум бўлишича, қарздор билан Telegram мессенжери орқали гаплашилганда, унинг бир неча бор биометрик паспорт олиш мақсадида тегишли тартибда элчихонага қилган мурожаати самарасиз бўлгани, алимент қарздорлигини бир мартага тўлиқ тўлай олмаслигини, имкон берилса, оз-оз миқдорда тўлаб беришини билдирган. Ҳозирда тўнғич фарзанди у билан бирга эканлигини айтган.
«Йўқ. Мен ҳар доим онажонимнинг ёнидаман ва унинг хабардори фақат ўзимман. Ўз отам ҳақида салбий муносабат билдирмоқчи эмасман, аммо мени бир неча йиллар олдин ёнидан ҳайдаб юборган. Аммо онажоним ва укам учун сабр билан ўз нонимни ўзим топишни, меҳнат қилишни ўргандим. Тенгдошларим тўп тепиб улғайиб ўсган ўсмирлик даврида мен совуқларда меҳнат қилиб катта бўлдим. Йўлимни топдим. Бироқ отамнинг мен учун алимент тўловидан кечдим. Тўғрироғи, керак эмас менга, муҳтож эмасман. Укамнинг таъминоти учун эса отам алимент тўловини тўлашга мажбур. Буни талаб қилишга эса онамнинг ҳақи бор», — дейди «Дарё» мухбири билан телефон орқали суҳбатлашган ўғил.
МИБ ижрочиси қарздорни қидирув масаласида республикага хат билан чиқилгани, тез кунда қарздорга нисбатан қидирув эълон қилиниб, қонуний жазо чоралари қўлланишини билдирган.
Изоҳ (0)