АҚШ Сенати мамлакатнинг Ўзбекистондаги янги элчисини эълон қилди. 2019 йилнинг май ойидан бери элчилик қилиб келган Даниэль Розенблюм ўзининг уч йиллик миссиясини якунлади ва унинг ўрнини Жонатан Ҳеник эгаллади.
АҚШ Сенатининг 27 июль куни бўлиб ўтган навбатдаги йиғилишида Жонатан Ҳеник АҚШнинг Ўзбекистондаги янги элчиси этиб тасдиқланди.
Ҳеник элчи-маслаҳатчи мақомига эга АҚШ Ташқи ишлар хизматининг юқори мартабали ходими ҳисобланади. Ўтган йилдан бери у АҚШ Давлат департаменти Миллий мудофаа университети қошидаги Ахборот ва кибермакон коллежида мудирлик қилади. У аввал АҚШ давлат котибининг Жанубий ва Марказий Осиё бўйича бюроси ёрдамчиси ўринбосари лавозимида ишлаган. У Жанубий ва Марказий Осиёда халқ дипломатияси ва оммавий ахборот воситалари билан алоқалар учун масъул бўлган.
Жонатан Ҳеник Нью-Йоркда туғилган ва рус, португал, турк ҳамда озарбайжон тилларини билади. Гаваи университетида сиёсатшунослик фанлари номзоди, Нью-Йоркдаги Колумбия университетида халқаро муносабатлар магистри, Колумбия коллежида бакалавр даражасига эга.
Мен АҚШ манфаатларини илгари суриш ва Ўзбекистон билан стратегик шериклигимизни мустаҳкамлаш, икки томонлама хавфсизлигимиз, халқлар ва иқтисодий алоқаларимизни мустаҳкамлаш, биз баҳам кўрадиган демократик қадриятларни илгари суриш учун ҳаракат қиламан. Шунингдек, мен АҚШнинг Тошкентдаги элчихонасида ходимлар жамоавий иш ва ҳурматни қадрлайдиган инклюзив муҳитни яратишга ҳаракат қиламан, — деди у ўз нутқи давомида.Маълумот учун, собиқ элчи Розенблюм АҚШнинг Қозоғистондаги элчиси сифатида фаолиятини давом эттиради.
Аввалроқ АҚШ президенти Жо Байден мамлакатнинг Ўзбекистондаги навбатдаги элчиси сифатида узоқ йиллик тажрибага эга дипломат Жонатан Ҳеник номзодини кўрсатганди.
Изоҳ (0)