Тошкент вилояти Далварзин чўлидан ноёб ўсимлик тури — Tulipa Borszczowii Baker турининг илк бор сенопопуляцияси топилди. Бу ҳақда ЎзА хабар бермоқда.
Таъкидланишича, Фанлар академияси Ботаника институти Камёб ўсимликлар турлари кадастри ва мониторинги лабораторияси илмий ходимлари Тошкент вилояти флорасининг кадастрини тузиш лойиҳаси учун дала тадқиқотларини олиб бормоқда. Тошкент вилоятида ўсувчи камёб ва йўқолиб кетиш хавфи остидаги ноёб ўсимлик турларининг (Nanophyton botschantzevii, Hedysarum drobovii, Kamelinia tianschanica) мониторинги амалга оширилди.
Тадқиқотлар давомида ДНК учун намуналар, ўсимлик уруғлари ва тирик ўсимлик намуналари, ўрганилаётган ҳудудлардан гербарий намуналари олиб келинди. Жараён давомида ҳудудда ўсувчи камёб ва йўқолиб бораётган ўсимлик турлари борлиги аниқланди. Жумладан, Tulipa Borszczowii Baker турининг Тошкент вилояти Далварзин чўлидан илк бор сенопопуляцияси топилди.
Лаборатория илмий ходимлари томонидан йиғилган маълумотлар Тошкент вилояти флорасининг кадастрини юритишда ишлатилади. Камёб турларнинг ҳолатини мунтазам равишда мониторинг қилиш ва Ўзбекистон «Қизил китоби»нинг янги нашрларини тайёрлашда фойдаланилади.
Изоҳ (0)