Шимолий Корея етакчиси Ким Чен Ин Пхеньян АҚШ билан ҳар қандай ҳарбий можарога тўлиқ тайёр эканини айтди. Бу ҳақда Жанубий Кореянинг Yonhap ахборот агентлиги КХДР давлат ОАВларига таяниб, хабар бермоқда.
«Шимолий Корея Қўшма Штатлар билан ҳар қандай ҳарбий тўқнашувга тўлиқ тайёр эканини яна бир бор айтаман», — деди Ким Чен Ин 1950—1953 йилларда кечган Корея урушидаги сулҳнинг 69 йиллигига бағишланган тадбирда.
Шунингдек, у Жанубий Корея президенти Юн Сок Ёлни агар Жанубий Корея ҳарбийлари Шимолий Кореяга зарба беришга «хавфли уриниш» қилса, улар йўқ қилиниши ҳақида огоҳлантирди.
«Агар Жанубий Корея режими ва ҳарбий безорилар бизга ҳарбий йўл билан ҳужум қилишни ўйлаб, маълум воситалар ёки усуллар асосида ҳарбий кучимизнинг бир қисмини олдиндан зарарсизлантириш ёки йўқ қилиш мумкинлигига ишонса, улар хато қилади», — деди Шимолий Корея раҳбари.
Унинг айтишича, КХДРнинг ядровий тийиб турувчи кучлари исталган вақтда сафарбарликка тайёр.
Изоҳ (0)