AQSH Senati mamlakatning O‘zbekistondagi yangi elchisini e’lon qildi. 2019-yilning may oyidan beri elchilik qilib kelgan Daniel Rozenblyum o‘zining uch yillik missiyasini yakunladi va uning o‘rnini Jonatan Henik egalladi.
AQSH Senatining 27-iyul kuni bo‘lib o‘tgan navbatdagi yig‘ilishida Jonatan Henik AQSHning O‘zbekistondagi yangi elchisi etib tasdiqlandi.
Henik elchi-maslahatchi maqomiga ega AQSH Tashqi ishlar xizmatining yuqori martabali xodimi hisoblanadi. O‘tgan yildan beri u AQSH Davlat departamenti Milliy mudofaa universiteti qoshidagi Axborot va kibermakon kollejida mudirlik qiladi. U avval AQSH davlat kotibining Janubiy va Markaziy Osiyo bo‘yicha byurosi yordamchisi o‘rinbosari lavozimida ishlagan. U Janubiy va Markaziy Osiyoda xalq diplomatiyasi va ommaviy axborot vositalari bilan aloqalar uchun mas’ul bo‘lgan.
Jonatan Henik Nyu-Yorkda tug‘ilgan va rus, portugal, turk hamda ozarbayjon tillarini biladi. Gavai universitetida siyosatshunoslik fanlari nomzodi, Nyu-Yorkdagi Kolumbiya universitetida xalqaro munosabatlar magistri, Kolumbiya kollejida bakalavr darajasiga ega.
Men AQSH manfaatlarini ilgari surish va O‘zbekiston bilan strategik sherikligimizni mustahkamlash, ikki tomonlama xavfsizligimiz, xalqlar va iqtisodiy aloqalarimizni mustahkamlash, biz baham ko‘radigan demokratik qadriyatlarni ilgari surish uchun harakat qilaman. Shuningdek, men AQSHning Toshkentdagi elchixonasida xodimlar jamoaviy ish va hurmatni qadrlaydigan inklyuziv muhitni yaratishga harakat qilaman, — dedi u o‘z nutqi davomida.Ma’lumot uchun, sobiq elchi Rozenblyum AQSHning Qozog‘istondagi elchisi sifatida faoliyatini davom ettiradi.
Avvalroq AQSH prezidenti Jo Bayden mamlakatning O‘zbekistondagi navbatdagi elchisi sifatida uzoq yillik tajribaga ega diplomat Jonatan Henik nomzodini ko‘rsatgandi.
Izoh (0)