28 июль куни АҚШда Республикачилар ва Демократик партияларнинг ўнлаб собиқ амалдорлари томонидан яратилган янги «Олдинга ҳаракат» (Forward) партияси иш бошлайди.
Унга Демократик партиядан президентликка собиқ номзод Эндрю Янг ва Нью-Жерси собиқ губернатори (Республикачилар партиясидан) Кристин Тодд Уитман раҳбарлик қилади.
Улар марказчи «Олдинга ҳаракат» партияси АҚШнинг иккита асосий партиясига муносиб муқобил бўлишига умид қилмоқда. Уларнинг таъкидлашича, партия Американинг «муваффақиятсиз икки партияли тизими»дан хавотирга тушган сайловчиларга мурожаат қилади. Ҳаммуассислар 2021 йили Gallup сўровига ишора қилди — унда америкаликларнинг учдан икки қисми АҚШ сиёсий тизимида учинчи партия зарур, деган фикрни билдирганди.
Партия ўзига аъзолар жалб этиш мақсадида жорий йилнинг кузида йигирмага яқин тадбир ўтказишни режалаштирмоқда. Ишга расман 24 сентябрь куни Хьюстонда старт берилади, биринчи тўлиқ таркибдаги йиғилиш эса келаси ёзда бўлиб ўтади.
Reuters хабарига кўра, янги партиянинг шиори шундай бўлади: «Чапга эмас. Ўнгга эмас. Олдинга ҳаракат» (Not Left. Not Right. Forward).
АҚШ сиёсати анъанавий равишда иккита асосий партия — Республикачилар ва Демократлар томонидан белгиланади. Бу партиялардан номзодлар 1852 йилдан бери президентлик сайловларида ғалаба қозониб келмоқда (фақат 1848 йилда «Виги» партиясидан Закари Тэйлор президент бўлган; бу партиядан бошқа ҳеч ким сайловларда ғолиб чиқмаган).
Икки асосий партиядан ташқари, Қўшма Штатларда «учинчи партиялар» деб аталадиган деярли 40 та кичик партиялар мавжуд, аммо улар сиёсатга сезиларли таъсир кўрсатмайди.
Изоҳ (0)