АҚШ округ судьяси Пол Магнусон Миннесота штатининг Сент-Пол шаҳрида бўлиб ўтган суд мажлисида Миннеаполиснинг икки собиқ полициячиси Ту Тао ва Александр Кенгга ҳукм ўқиди. Улар 2020 йилнинг май ойида афроамерикалик Жорж Флойднинг ўлдирилишига алоқадор деб топилди, дея хабар бермоқда Reuters.
36 ёшли Тао уч ярим йилга, 28 ёшли Кенг эса уч йилга озодликдан маҳрум этилди, деди Миннесота прокурори Эндрю Лугер.
Февраль ойида ҳакамлар ҳайъати Тао, Кенг ва яна бир собиқ полициячи, 39 ёшли Томас Лейнни Флойднинг конституциявий ҳуқуқларини бузганликда, яъни полиция ходими Дерек Шовин афроамерикаликни тўққиз дақиқа давомида тиз чўктириб, бўйнидан босиб турганда унга ёрдам кўрсатмаганликда айбдор деб топди. Прокуратура маълумотларига кўра, бу вақтда Кенг Флойднинг оёқларини тиззаси билан саккиз дақиқа ушлаб турган.
21 июль куни суд Томас Лейнни икки ярим йиллик қамоқ жазосига ҳукм қилди.
2021 йил июнь ойида суд собиқ полициячи Дерек Шовинга ҳукм чиқарган эди, у Жорж Флойднинг ўлдирилишида айбдор деб топилди. Унга 252 ой (21 йил) қамоқ жазоси тайинланган, бироқ суд унинг ҳибсда ўтказган етти ойини ҳисобга олган. Шундай қилиб, ушбу ҳукмга кўра, Шовин 20 йил-у беш ойни қамоқда ўтказади. 2022 йил июль ойида Шовин Флойднинг конституциявий ҳуқуқларини бузганликда айбланиб, 21 йилга қамалган эди. Иккала ҳукм ҳам бир вақтда ижро этилади.
Жорж Флойд 2020 йил 25 май куни Миннеаполисда полиция томонидан ҳибсга олинганидан кейин вафот этди. Флойднинг ўлими ирқий дискриминацияга қарши Black Lives Matter номи билан танилган оммавий норозиликни келтириб чиқарди. Намойишлар айрим ҳолларда тартибсизликлар ва полиция билан тўқнашувларга айланиб кетди.
Изоҳ (0)