Бухоро вилоятининг Ғиждувон туманида фермер шийпонидан 9 ойлик бола топилгани хабар берилганди. Айни пайтда шахси номаълум боланинг онаси қидирилмоқда. Бу ҳақда «Дарё»га вилоят ИИБ матбуот хизмати раҳбари Шуҳрат Жалолов маълум қилди.
Таъкидланишича, фермер хўжалигига қарашли ер майдони туманни кесиб ўтувчи халқаро аҳамиятга эга катта йўл ёқасида жойлашган. Шу боис бола қўшни вилоятлардаги фуқаролар томонидан ташлаб кетилган бўлиши мумкин деган тахминлар ҳам бор.
«Фермер хўжалиги сувчиси буғдойзордаги бола ҳақида биринчи хабар топган. Унинг сергаклик билан ҳуқуқ-тартибот идораларига хабар бериши боланинг ҳаёти сақлаб қолинишига сабаб бўлган. Бола туман тиббиёт бирлашмасига олиб борилган. Айни пайтда боланинг онаси қидирилмоқда. Бироқ унинг шахси аниқланмади. Энди эса олти ойдан бир йилгача бўлган муддат давомида фарзандли бўлган аёлларнинг қон таҳлили олинади. Кечиктириб бўлмас текширув ҳаракатлари давомида боланинг онаси топилади. Болани қаровсиз ва аянчли аҳволда ташлаб кетган шахси номаълум фуқарога нисбатан жиноят иши қўзғатилган», — дейди Шуҳрат Жалолов.
Маълумотларга кўра, чақалоқнинг танасидаги куйиш жароҳатлари унинг қуёш тиғи остида қолиб кетганидан далолат беради. У шифохонага беш фоиз куйиш даражаси билан ётқизилган. Барча текширув ва анализлар қилинган, аҳволи ўртача.
Вилоят Соғлиқни сақлаш бошқармаси бошлиғининг биринчи ўринбосари Ихтиёр Абдулҳақов бола айни пайтда Ғиждувон туман тиббиёт бирлашмасининг болаларни соғломлаштириш бўлимида шифокорлар назоратида эканини айтмоқда.
Изоҳ (0)