Сирдарёда спорт анжомлари харидида 1,2 млрд сўмдан ортиқ пул талон-торож қилинди

Сирдарё вилоятида спорт анжомлари харид қилишда 1,2 миллиард сўмдан ортиқ бюджет маблағлари талон-торож қилинди. Бу ҳақда ЎзА хабар берди.

Маълум қилинишича, 2021 йилнинг декабрь ойида вилоят туризм ва спорт бош бошқармаси томонидан 24 турдаги жами 2612 дона спорт анжомини харид қилиш учун 7 та фирма билан умумий қиймати 1 миллиард 976 миллион 778 минг сўмлик 31 та шартнома тузилган.

Лекин бош бошқарма ҳамда фирмаларнинг мансабдор шахслари ўзаро келишган ҳолда спорт анжомларининг сунъий қимматлаштирилган олди-сотдисини амалга оширган.

ДХХнинг Сирдарё вилояти бўйича бошқармаси ташаббуси билан ўтказилган судга оид товаршунослик экспертизасининг хулосасига кўра, умумий ўртача бозор қиймати 720 миллион 361 минг сўмни ташкил этган спорт анжомлари 1 миллиард 976 миллион 778 минг сўмга сотиб олинган.

Эслатиб ўтамиз, аввалроқ Сузиш федерацияси мансабдорлари 1 миллиард сўмдан ортиқ пулни талон-торож қилгани айтилганди.