Россияга ишлаш учун бориб, баландликдан йиқилган ва оғир тан жароҳати олган Ўзбекистон фуқароси ватанга қайтарилди. Бу ҳақда Ташқи меҳнат миграцияси агентлиги ахборот хизмати хабар берди.
Қайд этилишича, фарғоналик А.А. 2022 йилда вақтинчалик меҳнат фаолиятини амалга ошириш учун Россияга борган, 16 июль куни бахтсиз ҳодиса оқибатида баландликдан йиқилиб, оғир тан жароҳати олган ҳамда жарроҳлик амалиётини бошидан кечирган.
Бугунги кунда фуқаро меҳнат қилиш лаёқатини йўқотгани ва авиачипта сотиб олиш учун етарли маблағи йўқлигини маълум қилган ҳолда Ташқи меҳнат миграцияси агентлигининг Москва шаҳридаги ваколатхонасига мурожаат қилиб, Ўзбекистонга қайтишда ёрдам сўраган.
Хорижда қийин аҳволда қолган меҳнат мигрантларига ёрдам кўрсатадиган Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси ташкил этилган бўлиб, ана шу жамғарма ҳисобидан А.А.га авиачипта олиб берилиб, ортга қайтарилди.
Изоҳ (0)