«Жадидлар» номли китоблар тўпламини тайёрлаш ва 23 минг (ҳар бир тўпламда 8 та китоб жами 184 мингта) нусхада чоп этиш учун Ёшлар ишлари агентлиги томонидан 1 млрд 416 млн 800 минг сўм маблағ ажратилган. Бу ҳақда агентлик раҳбари Алишер Саъдуллаев Facebook’даги саҳифасида маълум қилди.
Алишер Саъдуллаевнинг ёзишича, тўпламни нашр этишдан мақсад жадидлар ҳақида ёшлар хабардорлигини оширишдан иборат.
«Жадидлар» китоби тўпламидаги ҳар бир китобни ёзиш учун муаллифларга 10 миллион сўмдан гонорар пули берилди. Ҳар бир тўплам ўрта ҳисобда 61 600 сўмга (ҳар бир китобча эса 7 700 сўмга) тўғри келмоқда. «Жадидлар» китоби тўпламини аҳоли, жумладан, ёшлар ўртасида кенг тарғиб қилиш орқали маърифатпарвар жадид боболаримиз ҳақида ҳар бир ёшнинг хабардорлигини ошириш асосий мақсад қилинган. Бу китобларнинг тарғиботи учун маблағ ажратилмаган.
Бугунгача 2 200 га яқин китоблар тарқатилди. Ижтимоий тармоқлар орқали мурожаат қилганларга, профессор-ўқитувчиларга, талабаларга, ўқувчи-ёшларга, вазирлик, идора ва ташкилотлар ходимларига — барча мурожаат қилганларга бирдек китоблар етказиб берилмоқда», – деб ёзган у.
Алишер Саъдуллаев тўплам қачон сотувга чиқарилишини ҳам очиқлаган.
«Жадидлар» китоб тўпламини август—сентябрь ойлари давомида мактаблар, профессионал таълим муассасалари, олий таълим муассасаларига — барча таълим ташкилотларининг кутубхоналарига мутлақо бепул етказиш режалаштирилган. Китоблар таълим муассасаларига тўлиқ етиб борганидан сўнг, сентябрь ойидан бошлаб сотувга чиқармоқчимиз. Агар таълим муассасаларига тўлиқ етиб бормасдан туриб сотувга чиқса, битта нарсадан қўрқяпмиз, ярим йўлда ўша китоб сотувга чиқиб кетиши мумкин. Шу сабабли, аввал барча таълим ташкилотларига бепул етиб боришини таъминлаб, ана ундан кейин сотувга чиқарилиши мумкин», – дея қайд этган агентлик раҳбари.
Изоҳ (0)