Темур Кубаев таниқли актриса Дилноза Кубаеванинг укаси. У ҳам аста-секин кино оламига кириб келмоқда. Темур томошабинларга «Дайди қизнинг дафтари»даги Акмал образи билан яхши таниш. «Дарё» мухбири Наргизахон Муродова ёш актёр билан суҳбатлашиб, унинг машҳур актрисанинг укаси бўлиш масъулияти борасидаги фикрлари, шахсий ҳаётидаги режалари ҳақидаги сўзларига қулоқ тутди.
«Санъатга кўчадан кириб келганим йўқ»
— Асли мутахассислигим актёрлик, айримлар ўйлагандек шунчаки қизиқиш учун рол ижро этаётганим йўқ. Илк ролимни Моҳигул Ҳамроеванинг «Дарахтлар қўшиғи» сериалида ижро этганман. Ундан кейин «Дайди қизнинг дафтари» сериалига таклиф этишди. Сериал машҳур асар асосида суратга олингани сабаб у катта шоу-шувларга сабаб бўлди. Аммо етарлича танқид ҳам қилинди. Сериал ҳаётий бўлгани учун Дилноза опам сериалда суратга тушишимга қаршилик қилмади. Юртимизда аввалгидек кўп кинофильмлар кўп суратга олинаётгани йўқ. Шу боис киноактёрларга ҳозирча сериалдан бошқа танлов йўқ.
«Опамга бўладиган қўнғироқларни фильтрлаймиз»
— Кўпчилик мени опамнинг маъмури деб билади. Тўғри, ҳамиша опамнинг ёнида бўламан, аммо маъмур эмасман. Шунчаки акаларим билан бирга опамга бўладиган қўнғироқ ва таклифларни фильтрлаймиз. Яъни опамга эркаклар қўнғироқ қилишини истамаймиз. Шу боис аввал улар билан гаплашиб, ижодий таклифларини ўрганиб чиқамиз.
«Актрисага уйланмайман»
— Кейинги пайтларда опам ҳам, онам ҳам мени уйлантиришга жиддий аҳд қилган. Мусулмончиликда оила қуришга жиддий эътибор бериш кераклиги таъкидланган. Шу боис, оила қуришга шошилаётганим йўқ. Турмуш ўртоғим санъатни тушунишини истайман. Аммо унинг бу соҳада фаолият юритишини истамайман. Четдан қараганда ижодкорлар ҳаёти чиройли кўриниши мумкин. Аммо бу соҳа хатоларни кечирмайдиган бешафқат касб ҳисобланади. Опам ҳам мен ҳам шу соҳада нон топаётганимиз учун турмуш ўртоғим ҳам санъат вакиласи бўлишини истамайман. Иккита ижодкорнинг бир оила бўлиб яшаши олқишларга сабаб бўладиган ҳолат. Назаримда, икки ижодкор бор вақтини суратга олиш майдончасида ўтказишса, оила мувозанати бузилади. Аммо тақдири азал, пешанага ким ёзилганини олдиндан билолмаймиз.
«Аёлим Дилноза Кубаевага ўхшашини истайман»
— Кўпчилик аёллар онамга «Қизим Дилнозага ўхшашини орзу қиламан, унинг тарбиясида нималарга эътибор беришимни тавсия қиласиз?», деб сўрашади. Бундан, албатта, хурсанд бўламиз. Аёлим ҳам опамдек фаросатли, сабрли, матонатли ва эътиборли бўлса жон дердим. Опамнинг хотираси мустаҳкам. Ҳеч нарсани эътиборидан четда қолдирмайди. Нима истаётганимизни гапирмасимиздан аввал билади.
Дилноза Кубаеванинг укаси бўлиш масъулияти
— Киноижодкорлар орасида менга Темур Кубаев эмас, «Фалончининг укаси» деб қарашлари катта масъулият юклайди. Шунда фалончи даражасига етгунга қадар ҳали кўп меҳнат қилишим керак экан, деб ўйлаб қоламан. Бундан ташқари, ижодкорлар бир вақтнинг ўзида ҳам опамга, ҳам менга баҳо беришади. Шу вақтгача опам ҳақида бирорта ёмон гап эшитмаганман. Опам шунча йиллар давомида мисқоллаб йиққан обрўсининг тўкилишини истамайман. Чунки менинг ижоддаги ва ҳаётдаги хатти-ҳаракатларим қайсидир маънода опамга ҳам таъсир этади. Одамлар Темурдан кўра, Дилноза Кубаевани анча яхши танишади.
Мавзуга доир:
- Дилноза Кубаеванинг укаси, Севара Назархоннинг холаваччаси: қариндош эканини кўпчилик билмайдиган ўзбек санъаткорлари (фото)
- « ‘Осмондаги болалар-3’да суратга тушмоқчиман». Дилноза Кубаева актрисаликни тарк этиб, хонандалик қилмоқчилиги ҳақидаги миш-мишларга изоҳ берди (видео)
- Дилноза Кубаева шахсий ҳаёти, «Телба»да ёлғон ишлатгани, тушкунлик туфайли семиргани ҳамда Шаҳзода билан муносабатлари ҳақида (видео)
Изоҳ (0)