“Jadidlar” nomli kitoblar to‘plamini tayyorlash va 23 ming (har bir to‘plamda 8 ta kitob jami 184 mingta) nusxada chop etish uchun Yoshlar ishlari agentligi tomonidan 1 mlrd 416 mln 800 ming so‘m mablag‘ ajratilgan. Bu haqda agentlik rahbari Alisher Sa’dullayev Facebook’dagi sahifasida ma’lum qildi.
Alisher Sa’dullayevning yozishicha, to‘plamni nashr etishdan maqsad jadidlar haqida yoshlar xabardorligini oshirishdan iborat.
“Jadidlar” kitobi to‘plamidagi har bir kitobni yozish uchun mualliflarga 10 million so‘mdan gonorar puli berildi. Har bir to‘plam o‘rta hisobda 61 600 so‘mga (har bir kitobcha esa 7 700 so‘mga) to‘g‘ri kelmoqda. “Jadidlar” kitobi to‘plamini aholi, jumladan, yoshlar o‘rtasida keng targ‘ib qilish orqali ma’rifatparvar jadid bobolarimiz haqida har bir yoshning xabardorligini oshirish asosiy maqsad qilingan. Bu kitoblarning targ‘iboti uchun mablag‘ ajratilmagan.
Bugungacha 2 200 ga yaqin kitoblar tarqatildi. Ijtimoiy tarmoqlar orqali murojaat qilganlarga, professor-o‘qituvchilarga, talabalarga, o‘quvchi-yoshlarga, vazirlik, idora va tashkilotlar xodimlariga — barcha murojaat qilganlarga birdek kitoblar yetkazib berilmoqda”, – deb yozgan u.
Alisher Sa’dullayev to‘plam qachon sotuvga chiqarilishini ham ochiqlagan.
“Jadidlar” kitob to‘plamini avgust—sentabr oylari davomida maktablar, professional ta’lim muassasalari, oliy ta’lim muassasalariga — barcha ta’lim tashkilotlarining kutubxonalariga mutlaqo bepul yetkazish rejalashtirilgan. Kitoblar ta’lim muassasalariga to‘liq yetib borganidan so‘ng, sentabr oyidan boshlab sotuvga chiqarmoqchimiz. Agar ta’lim muassasalariga to‘liq yetib bormasdan turib sotuvga chiqsa, bitta narsadan qo‘rqyapmiz, yarim yo‘lda o‘sha kitob sotuvga chiqib ketishi mumkin. Shu sababli, avval barcha ta’lim tashkilotlariga bepul yetib borishini ta’minlab, ana undan keyin sotuvga chiqarilishi mumkin”, – deya qayd etgan agentlik rahbari.
Izoh (0)