Қорақалпоғистон Республикасининг Нукус шаҳри ва Кегейли туманидан Андижон вилоятига келган ўқувчиларнинг 200 нафари ёзги таътилни Андижонда ўтказмоқда. Бу ҳақда «Дарё» мухбири Умиджон Мамарасулов хабар берди.
Ёшлар ишлари агентлигининг вилоят бошқармаси бошлиғи Ойбек Йўлдошевнинг маълум қилишича, болалар «Андижон» темир йўл вокзалида тантанали равишда кутиб олиниб, Балиқчи туманидаги «Шаббода» болалар оромгоҳига жойлаштирилган. Оромгоҳда қорақалпоғистонлик болаларнинг таътил вақтини мазмунли ўтказиши, дам олиши ва соғломлаштирилиши учун барча шароитлар яратилган.
Ўн кунлик мавсум давомида улар учун футбол, шахмат, шашка, стол тенниси, волейбол, расм, рақс, адабиёт, рус ва инглиз тили тўгараклари фаолият юритиши, вилоятда истиқомат қилувчи таниқли шоир ва ёзувчилар, жаҳон ва Олимпиада чемпионлари билан учрашувлар ўтказиў, турли танловлар ва диққатга сазовор жойларга саёҳатлар ташкил этиш белгиланган.
Маълумот учун, Андижон вилояти Қорақалпоғистоннинг Кегейли туманини оталиққа олган.
Изоҳ (0)