Тошкент давлат иқтисодиёт университети ректори Қўнғиротбой Шарипов «Дарё» нашрига берган интервьюсида ёшларга репетиторга боргандан кўра, мустақил таълим олишни ўрганиш яхшироқ эканини айтди.
Қўнғиротбой Шариповнинг таъкидлашича, болалар ёшлигидан яхши ўқишга ўрганиши керак.
«Мен Қорақалпоғистон Республикасининг Қўнғирот туманидаги чекка бир қишлоқда катта бўлганман. Оддий мактабда ўқиганман. Қўшимча дарсга – репетиторга бормаганман. Мактабда ўқирдик, уйга келганимиздан кейин ота-онамиз мажбурлаб дарс қилдирарди. Ўзимизни устимизда ишлаганмиз.
Ҳозир одамларни фикри ўзгариб кетган: репетиторга бормасанг, ўқишга киролмайсан, деган ганлар айтилади. Бола ёшлигидан яхши ўқишни ўрганиши керак. Масалан, мактабда математика фанидан битта мисолни бир усулда ечишни ўргатади. Бола уйга келиб, шу мисолни икки-учта усулда ечишни ўрганса, унда олган билими бир умрга қолади.
Афсуски, ўтган 30 йилда ўқитувчининг ҳам мотивацияси бўлмади. Доим уни кўчага ҳайдадик, пахтага чиқардик, болалар ҳам шу иш билан юрди. Натижада ўқитувчилар ўз кунини бир нарса қилиб кўриш учун бозорга чиқиб кетишди. Ўқишга бўлган қизиқишни йўқотиб қўйдик. Бола мактабдан келганидан дарров молга ўт териб келиши ёки кўчада озгина тадбиркорлик қилиши, яъни пул топиб келиш муаммоси бўлиб қолди.
Ҳаёт шу даражага бориб қолган эди. Шунинг учун одамлар «ўқиганинг билан нима бўласан, бугунги кунимизни яшайлик», деган принципда яшагани учун ҳам кўп нарсаларни бой бериб қўйдик. Энди-энди бу нарсалар қайтадан тикланяпти. Мисол учун, ҳозир профессор-ўқитувчиларни ойлиги ўзига етадиган давр, маза қилиб ишлайдиган вақт. Мактаб тизими ҳам яхшиланиб келмоқда. Ёшларда ўқиган бола келажакда катта мақсадларга эриша олади, деган туйғуни ва шунга ишончни уйғотишимиз керак»,– деди университет раҳбари.
Аввлроқ Қўнғиротбой Шарипов болалар мактабда 9 йил, лицейда 3 йил ўқиб ҳам, чет тилини мукаммал ўргана олмаётганининг сабабларини айтганди. Шунингдек, у университетда айрим ўқитувчи-профессорлар 10 000 доллардан ортиқ маош олгани тўғрисида ҳам гапирган.
Изоҳ (0)