Филиппиннинг Кесон шаҳридаги Атенео де Манила университети кампусида содир бўлган отишмада уч киши ҳалок бўлди, бир киши яраланди. Бу ҳақда ABS CBN нашри полиция бошлиғи Ремус Мединага таяниб хабар берди.
Нашр манбаларининг маълум қилишича, қуролланган номаълум шахс юридик факультетнинг битирув маросими вақтида отишма содир этган. Маросимга олий судья Александр Жесмундон ҳам таклиф этилганди, ҳодиса пайтида судья ҳали йўлда бўлган.
«Отишмада Басилан провинциясидаги Ламитан шаҳрининг собиқ мэри Роуз Фуригей ва унинг ёрдамчиси Виктор Капистрано ҳалок бўлган. Қурбонлар орасида қўриқчи ҳам бор», — деган полиция бошлиғи. Собиқ мернинг қизи, ҳуқуқшунослик факультети битирувчиси Ханна Роуз эса яраланган.
Ҳужумчининг шахси ҳозирча номаълум, полиция уни ҳибсга олган. Воқеа жойига Миллий тергов бюросининг бир гуруҳ ходимлари жўнаб кетган.
19 июль куни Париж шарқидаги барда отишма содир бўлган эди. Икки ҳужумчи кечқурун барга келиб, терассада ўтирган меҳмонларга қарата ўқ узган. Бир киши ҳалок бўлган, яна тўрт киши яраланган.
Изоҳ (0)