Хитойдаги ҳар қачонгидан ҳам қийинроқ иқтисодий муҳитга мослашишга уринаётган хитойлик истеъмолчилар муддати ўтган озиқ-овқат маҳсулотларини чуқур чегирмаларда кўпроқ сотиб олишмоқда. Бу ҳақда Financial Times’га таяниб, «Коммерсантъ» хабар бермоқда.
Маълум бўлишича, йил давомида Хитойда бундай маҳсулотларни сотадиган 119 та ихтисослаштирилган дўкон очилган. Сўнгги ўн йил ичида бу кўрсаткич 92 та эди.
Газетага интервью берган хитойлик экспертлар бундай дўконлардаги харидорларнинг катта қисми ўрта синф вакиллари эканлигини таъкидламоқда.
Ишчилар муддати ўтиб кетган маҳсулотлар билан кун кечиришга ишонаётгани ҳайратланарли, — дейди iiMedia консалтинг фирмасининг катта илмий ходими Чан Йи.
Сўровда қатнашган 1600 харидорнинг учдан икки қисми ойига 4000 юандан кўпроқ ( тахминан 600 доллар) маош олишларини айтди. Бу ўрта ва кам даромадли одамлар ўртасидаги ажратувчи чизиқ сифатида кўрилади.
Бошқа бир консалтинг фирмаси, China Маrket Research Group маълумотларига кўра, Хитойда яроқлилик муддати тугаган товарлар савдосининг ўсиши 2019 йилдаги 25 млрд юандан (3,6 млрд доллар) бу йил 36 млрд юанга (5,3 млрд доллар) кўтарилади.
Изоҳ (0)